Russian sorkar chanchinbu chuan Ukraine khawchhak lam Donbas region-a inbeihna thleng mekah Moscow sipai general lawk tak a chân leh tih a puang.
Maj Gen Roman Kutuzov hi helai hmuna Ukrainian awm mekte beihnaa hmahruaitu ber niin sorkar enkawl Rossiya 1-a thawk chuan a tar lang.
Alexander Sladkov-a chuan Gen Kutuzov-a hi mahnia indanga inpuang, Donetsk People’s Republic-a sipaite hruaitu ber a ni.
Russian defence ministry erawh chuan he thil hi engmah a sawi ve lo.
“General hian sipaite hi inbeihnaah hian a hruai,” tiin Sladkov hian Telegram social media app-ah a tar lang a. “Roman-a hi commander dang ang bawka huaisen leh nihna sang tak nei a ni,” a ti.
Ukraine sipaite pawhin Gen Kutuzov-a an thah thu leh engtin nge an thah tih erawh an sawi lo.
A thi tih puan a nih hnuah hian social media-ah sunna leh uina thu tar lan a ni nghal a. Second senior officer, 29th Army commander Lt Gen Roman Berdnikov chuan pawh kartawpah khan a thi nia sawi a ni bawk.
Russian commander-te hi indonaah hian a hmatawngah thawkin an tir nasa hle a, Moscow pawhin an general hlun tak tak pathum an thih tawh thu an sawi.
Kyiv erawh chuan general 12 lai thi tawh angin an sawi a, khawthlang ram intelligence official-te erawh chuan pasarih vel thi tawh angin an sawi.
Russian sipai hotu lawkte thi anga sawi inzat lo hi titi a tam hle a. Ukrainian sipaiten thi anga sawi general pathum chu an la dam nia sawi a ni.
March thla khan Ukrainian sipaite chuan Maj Gen Vitaly Gerasimov chu an khawpui pahnihna, Kharkiv bulah thah a nih thu an sawi a. May 23 khan Russian sorkar chanchinbu chuan chawimawina hlan a nih thu leh a thi tia sawina hi a dik loh thu an tar lang ve thung.
Commander dang, Maj Gen Magomed Tushaev pawh thi anga sawi ni mah se a la dam nia ngaih a ni a, social media-a video dah chhuah tharah te pawh a la lang nual.
March 18 khan Kyiv chuan Lt Gen Andrey Mordvichev chu Kherson region-a thlawhna atanga kahnaah a thi niin an sawi bawk a; mahse, a hnuah video meeting-ah Chechen hruaitu, Ramzan Kadyrov nen May 30-ah an inbe leh a. BBC Russia pawhin a la dam tih an finfiah.
Russia-ah hian general thi hi an tam lo hle a. Maj Gen Vladimir Frolov-a chu a thi tih sawi a awm miah loh laiin April thla khan St Petersburg-ah a vuina inkhawm neih thung a ni.
Russia hian a sipai thite hming hi indo lai kher lo pawhin sorkar thuruk angin a vawng a. March 25 hnu lama Ukraine dona thi leh hliam zat pawh a sawi leh tawh lo va, hetih lai hian sipai 1,351 chan tawh angin an insawi.
March thla khan Ukrainian President Volodymyr Zelensky-a bul hnaia awm thin thuneitu pakhat chuan Wall Street chanchinbu hnenah Ukrainian military intelligence officer-te chu Russia sipai officer lawk chin awmna hriat tuma bei turin an thawk chhuak tih an lo sawi tawh.
“General, pilot leh artillery commander lawk chinte an zawng a ni,” tiin a sawi a. An awmna chin an hria a nih chuan ralsai thiam emaw, laipui hmangin emaw beih an ni dawn tih a sawi bawk.