AS Monaco in Takumi Minamino an lalut dawn

Liverpool chuan an Japan international Takumi Minamino chu AS Monaco hnenah Euro maktaduai 18 in an hralh dawn.

Ligue 1 club hi kum 27 mi forward ngaihventu club engemaw zah zing ami an ni a. Reds hian kum 2020 a Red Bull Salzburg atanga Pound maktaduai 7.25 a an lakluh player hi a khelh tam loh avangin chhuahtir mai an hnial lo.

Minamino manah hian Liverpool in Euro maktaduai 15 an dawng anga, a bak Euro maktaduai 3 chu a khelh dan a zir a pek belh tur a ni ang.Minamino hian Anfield a hun a hman chhungin Reds tan vawi 55 inkhelin goal 14 a khung hman a. Season liamta khan cup inelnaah an tana goal khung hnem ber a ni.

Jurgen Klopp-a pawlten FA Cup leh League Cup an chawina kawngah Minamino hian goal sarih a khung a. Mahse Premier League-ah erawh vawi khat chiah bul tanin match 11 ah chiah khelmual a lut.

Kum 2021 February thla khan loan in Southampton tan a lo inkhel tawh bawk.

Minamino chuan khelhna hmun a chang tam lo chu a tan harsatna a nih thu a sawi a. “Squad player nih a midang thachhangdawltu ka nih khan inchhirna leh thinurna chhungrilah min siamsak a, mahse khang zawng zawng kha khelmualah lantirin ka inkhelh chhunah ka chhawr thin. Ka match khelhte kha mi ngaihven loh inkhel zel a ni a, hetiang hi player anga ka la tawn ngai loh vangin a awlsam lo hle.” a ti.

Leave a Reply

Your email address will not be published. Required fields are marked *

error: Content is protected !!