Baibul leh Shakespeare-a thu leh hlate inlaichinna

  • Ziakfung Ngawichawi

Tun hnaiah nasa takin ţhangthar rualte. thu leh hlaah an harh thar a. Tun hma lam ngaihtuahin, thu leh hla khawvelah hla hril (poetry) khawvel phei chu kan ngaina lo hle ţhin. Mahse, tun kum hnih khat chhûng lêk pawh hian hla hril hlang dahna lehkhabu a chhuak ta zawih zawih mai a nih hi. Hei hi nasa takin phûrna min pe a, hun lo la kal zel turah william Shakespeare-a leh Chaucer-ate ang thu leh hla pawh kan la tuipui phâk ngei beiseina min pêk phah a nih hi.

Tun ţum chu khawvel thu leh hla huanga deh loh sakei huai an sawi, William Shakespeare-a leh kan Baibul inlaichinna kan han tarlang zuai dâwn a ni. Khawvela Literature huaisen ber, darh zau ber chu Baibul niin, thu leh hla khawvela Sailo Ngûrpui an sawi thung chu Shakespeare-a hi a ni. Hei vang hian Shakespeare-a hian a Poets puite ang bawkin Baibul hi a hman rim ka ring ţhin a, mahse chu mi zuk finfiah tur chuan a kut chhuak piah lamah Baibul belhchian ve a ngaih tlat avangin, Baibul leh Shakespeare-a kut chhuak hriat chian chu tihmâkmawh a ni lo thei lo.

Shakespeare-a hian khawvela English Baibul chhuak hmasaho kha a lo la khawm nasa mai a lo ni a. Geneva Baibul copy ringawt pawh za chuang neiin, Baibul chi hrang hrang, ţawngţai hlate thlengin a lo la khawm a lo ni. Ngun taka thlithlaina rah chhuah aţanga lo lang ta chu, Elizabethan Poets zingah rau rau Shakespeare-a khân Baibul thu leh hla a lo hmang rim ber tih hi a ni ta a ni.

Shakespeare-a khân Baibul hi a hre bel hneh hle tih, a lemchan hrang hranga Baibul thu leh hla a hman dan aţangin kan hmu thei ta a lo ni. Hamlet leh Othello lemchante khân Baibul thu leh hla 50 aia tam hman a nei reng a lo ni a. Tin, Baibul thu leh hla chheh dan chiah hmang si lovin, Baibul thu leh hlain a sawi tum ang ni si hmanga thu leh hla a rem hi tam tak hmuh tur an awm bawk.

Tichuan, Shakespeare-a hian a lemchan 38 aţangte khân, Allusion leh Quotation a hman zat niawm hriat theihte chu Baibul lehkhabu 42 aţangin an ni a. Chung lehkhabu zingah chuan Thuthlung Hlui Bu 18 leh Thuthlung Thar Bu 18 bawk leh, Apocrypha aţangin Bu 6-te an ni. Hei hian Shakespeare-a’n Baibul a belhchian thawkhat turzia a tarlang chiang hle awm e.

Amaherawh chu tuna kan Baibul hman lâr ang ni lo hian, Geneva Baibul zawk kha a chhawr rim ber a ni tih lo hre ta ila. Entirna han pe ta ila; ‘If it were done when ’tis done, then ’twere well. It were done quickly… (Hamlet, Scene VII) tih a rawn chher chhuahna chu, John 13:27 (Geneva Bible): Then said Jesus unto him, That thou doest, do quickly, tih aţanga a kaihlek angte hi hmuh tur a tam hle a lo ni.

Shakespeare-a thu leh hla ka duh êm êm zinga mi, The Merchant of Venice lemchana Poria-i’n; How far that little candle throws his beam! So shines a good deed in a naughty world, a tihte khân Philipi 2:15 thu; …among whome ye shine as lights in the worlde, tih aţanga a rawn chher chhuah a ni. Kum 1611 khân KJV Baibul hi tihchhuah a nih chauh avang leh, tihchhuah a nih hnuah Shakespeare-a hian kut chhuak a neih tam tak si loh avangin, Geneva Baibul kha a hman rim ber tih loh rual a lo ni lo.

Hamlet kan en chuan, Horatio-a’n, carnal, bloody and unnatural acts…and in the upshot, purposes mistook, Fall’n on th’inventor’s heads, a han tihte kha, Ì Lalte 2:32 thu – the Lorde shal bring his blood upon his owns head, tih nen chhul khat chhuak an nihna kan hmu thei a. Two Gentlemen of Verona lemchana, follows the shepherd for food, tihte pawh Ezekiela 34 thu aţanga lak a ni tih a hriat mai bawk.

Shakespeare-a hian Sam leh Thuthlung Thar ringawt ni lovin, Thuthlung Hlui thlenga a chhiar nasat turzia min hriattir mai awm e. Chu mai a la ni lova, Apcrypha thlengin, a kut chhuak chei hnûm nân a hmang tih a kut chhuak kan zir chuan kan hmu thei bawk. Baibul thu leh hla a hman rim bera an sawi chu, Kaina leh Abela thu aţangin a ni a. Baibul bu zinga a hman rim ber erawh Sam Bu hi a ni thung.

Chhuitu ţhenkhat phei chuan Baibul thu leh hla 1200 chuang Shakespeare-a hian a hmang a, hei aia tam pawh hmuh tur a la awm ring pawh an awm bawk. Genesis, Matthaia leh Joba hi a hman rim pâwl tak an ni a. Lemziak thiam hmingthang berte zinga mi Picasso-a khân, ‘Good artist copy, but great artist steal’ tia a lo sawi hmang thiam ber zinga mi ni kumkhua tawh tur chu Shakespeare-a kha a lo ni.

Thufing 5:15-18 thu-a, tui hna leh tui bel thute kha Othello lemchanah Desdemona-i ţawngkamah kan hmu a. Khawvela thiamna lama sulsuttu leh thluak ţha ber ber an tihte hi Juda mi an ni zel a. Chu mi ka zuk chhuinaah chuan, Baibulah hian hriatna engkim a awm a, chu chu an zuk zir chhuak mai a ni, tih hriattir ka ni. Mahse, Shakespeare-a thu leh hla tuipui tak tak mi chuan, zirna lam a ni emaw, eizawnna a ni emaw, vantlâng nun leh kalsiam a ni emaw, retheih pachhiat a ni emaw, kawng engkim hrut loh ahleih a nei lo tih a chhiar chhuak ve fovin ka ring. Tichuan, ţhangtharte pawhin kan Baibul thu leh hlate hi zir chîk leh zualin, kan thu leh hla thuam hausak nân leh chei mawi nân kan hmang thei tih hriain, hma i sawn zel ang u.

Leave a Reply

Your email address will not be published. Required fields are marked *

error: Content is protected !!