Bayern Munich in forward Sadio Mane an phochhuak

UEFA Champions League final a an tlin zawh loh atanga ni rei loteah Liverpool forward Sadio Mane chu khawvel football chanchinthar luahtu lian zingah a tel nghal a. A hma hun chungchanga hun engemaw chen thuthang a awm hnuah German champion Bayern Munich a zawm fel.

Mane lakluh nan hian Bayern Munich chuan Pound maktaduai 35 an seng a, an hnenah kum 2025 thleng contract a ziak.

Liverpool hian a manah hian Pound maktaduai 27.4 chu an dawng phawt anga, inkhelh zat bituk an neih a inkhelh tlin hunah Euro maktaduai 6 dawn pe lehin mimal leh team hlawhtlin dan a zirin Euro maktaduai 3 an pe leh dawn bawk a ni.

A kim changin

Liverpool hian Bayern nen hun engemaw chen inbiakna an neih chhungin Mane man chungchangah an dilna hmasa pahnih an hnawl tawh a. A vawi thumnaah erawh an inrem thei.

Kum 30 mi hi nakkum nipui a contract zo tur a ni a, amahin chhuah a duh bawk avangin Liverpool in man nei a hralh a nih theih laiin remchang an la.

“He chona thar hmachhawn tur hian a hun tak a ni. He club ropui tak hian tih tak zetin min ngaihven nghal tih ka hria a. Ka hriat tirh atangin ka rilru ka siam fel nghal.” tiin Mane chuan a sawi.

“He club-ah hian hlawhtlinna tam tak neih ka duh a, kan ram tan pawh hlawhtlin zel ka duh. Salzburg a ka inkhelh lai khan Bayern Munich inkhel ka ngaihven nasa a, he club hi ka ngaina hle.” tiin a sawi bawk.

Kum 2016 June a Pound maktaduai 34 a Liverpool in an lei hian season liamta khan inelna hrang hrangah goal 23 a khung a. Anfield-ah a cham chhungin match 269 atangin goal 120 a khung.

Bayern president Herbert Hainer chuan, “Sadio Mane hi khawvel football a star lar tak a ni a, hei hian Bayern Munich in star player a hipzia chiang takin a tilang a. Bundesliga a inkhelh hi a chakawm tih a lantir. Hetiang player danglam bikte en tur hian stadium-ah fans te an kal khawm thin.” tiin a sawi ve bawk.

Liverpool manager Jurgen Klopp chuan, “Tuna kan hun tawn hi thil lian tham a ni a, hun ropui tak kalsanin bung thar kan kai a, hei hi pawm loh theih a ni lo.”

“Liverpool chanchin a player ropui ber zing ami in club a chhuahsan a, hei hi a lenzia sawibo theih a ni lo. Mahse kan chan tak lam kan ngaihtuah tur a ni lova, helaia hlawhtlinna kan lo chan hote kan ngaihlu zawk tur a ni.” a ti.

Leave a Reply

Your email address will not be published. Required fields are marked *

error: Content is protected !!