BJP-in president atan tribal nu, Murmu-i vawrh chhuak

India-a rorel lai, BJP chuan president thlan lo awm turah an party atanga chuhtu atan Droupadi Murmu an ruat tih an puang chiang ta.

Zirtirtu hlui, kum 64 mi hi Orissa state mi niin kum tam tak chhung BJP hruaitu niin state governor pawh lo ni tawh a ni.

Inthlan lo awm turah hian hnehna a chang a nih chuan tribal hruaitu zinga chanvo sang ber chelh hmasa ber a ni ang.

India-ah hian president hi ram thuneitu sang ber a ni a; mahse, ama thuin thutlukna tawp a siam thei lo thung.

President-te hi ram rorelna, parliament-a in hnih, Lok Sabha leh Rajya Sabha member, state tina legislative assembly member leh sorkar laipui hnuaia union territory-a MLA-ten an thlang thin.

Tuna a lan danah chuan BJP-in an dintir tlin theihna tur khawp hian member an ngah tawk nia ngaih a ni.

Prime Minister Narendra Modi chuan Murmu-i hi ‘president ropui tak’ a nih ngei a rin ngheh tlat thu a sawi.

Thawhlehni tlaia BJP parliamentary board thukhawmin Murmu-i hi ding turin thu an titlu a, party president JP Nadda chuan hming 20 an chhawp zingah an thawhpuite nen lungrual takin an pawm tih a sawi.

Murmu-i hian president atana ding tura tihna hi television-a chanchinthar puan atanga a lo hriat thu leh mak a tiin a phur thu a sawi.

“Mayurbhanj district kilkhawra tribal nu tan chuan chanvo sang ber chuh hi suangtuah phak a ni lo,” tiin thuthar lakhawmtute a hrilh.

Odisha-a party tinin Murmu-i a ding tur hi an lawm a. Amah pawhin an state-a MP leh MLA zawng zawngin an thlawp a beisei tih a sawi.

Murmu-i hian eptu tangrualten an dintir tur, politician hlun leh BJP hruaitu hlui, Yashwant Sinha a khing dawn a. BJP kaihhruai, Prime Minister Atal Bihar Vajpayee-a sorkara minister hlun tak thin, Sinha hi tunah chuan saffron party leh Modi-a sawiseltu ber a ni tawh.

Eptute hian Sharad Pawar leh Farooq Abdullah bakah Mahatma Gandhi tupa, Gopalkrishna Gandhi te an sawi ri hmasa a, an phat hnuah Sinha hi an dintir ta a ni.

President thlan hi July 18-a neih tur niin July 21-ah vote tla chhiar a ni ang.

Hnehna chang chuan July 24-a a hun tawp tur, President Ram Nath Kovind-a a thlak dawn a ni.

Leave a Reply

Your email address will not be published. Required fields are marked *

error: Content is protected !!