Lirnghingin Afghanistan a sawi, mi sang chuang an thi

Lirnghing na takin Afghanistan a sawiah mi sang khat vel an thi a, mi dang thahnem takin hliam an tuar bawk niin Taliban thuneituin BBC.

An ram khawchhak lam, Paktika province-a thil thleng thlalak thehdarhah chuan lei min leh hluma sak in chhia a tam hle tih a lang a, chhanchhuah hna thawktuten hliam tuar an buaipui nasa hle bawk.

Taliban hruaitu, Hibatullah Akhundzada chuan in za chuang chhiain thi an pun ngei a rinawm thu a sawi.

Tun hi Afghanistan-in kum 20 liam ta chhunga lirnghing a tawrh nat ber a ni.

Paktika province information hotupa, Mohammad Amin Hazifi chuan mi 1,000 an thih thu leh mi 1,500-in hliam an tawrh thu BBC a hrilh.

Chhanchhuah hna thawktute chuan in chimin a chhilh karah mi dang an la zawng mek bawk tih a sawi.

Lirnghing hi Khost khawpui chhimchhak lam km 44 vela hlaah an ram sanaa Nilaini zing dar 1:30 (India-a zing dar 2:30) vela thleng niin mi tam zawk an mut lai a ni.

“Kawtthler tinah miin an duhtakte an sun thawn hriat tur a awm a, in a chim nasa hle bawk,” tiin a tuar na ber, Paktika province-a chanchinbumi pakhat chuan BBC a hrilh.

Afghanistan-ah hian thingtlanga in an sakte hi a rinawm lovin an sa uluk lo thei hle a, lirnghing a ngam lo thin hle.

Lo neitu pakhat, Alem Wafa chuan a tuar na ber zinga mi, Gyan khuaah rescue team an la thlen loh thu sawiin a buaithlak thu a sawi.

“Official aid worker an la awm lo va; mahse, khaw thenawm atangin puitu tur an lo kal a. Zingah ka thleng a, kei ringawt pawhin ruang 40 ka hmu tawh a ni,” a ti.

“A tam zawk hi thalai leh naupang an ni a, damdawi in chu a awm a; mahse, he chhiatna hi a dawl zo lo a ni,” a ti bawk.

Taliban thuneitute chuan tanpuitu pawlte chu an ram khawchhak lama tuartute tana che chhuak vat turin an ngen.

Afghanistan-ah hian tanpuitu pawlten in tha zawk din ve bawk thin mah se kum tam tak chhung buainain a tuam ramah hian lirnghing leh khuarel chhiatna dang laka himna tur anga hmalakna a tam lo hle.

Taliban-in thuneihna an chan hma khan emergency services chuan khuarel chhiatna thlenga chet chhuahna lam pawh an ngaihven ve a, chhanchhuah hna thawh nan thlawhna leh helicopter tlem azawng an nei ve.

Lirnghing hian mobile phone tower tam tak a tihchhiat bawk avangin inbiakpawh a harsa hle a, thi zat pawh hi a that hunah a pun ngei a rinawm niin chanchinbumi pakhatin BBC a hrilh.

“Mi tam tak chu an phone a hman theih miau loh avangin rala an chhungte dinhmun pawh an la hre thei lo,” a ti a. “Kei pawh ka unaupa leh a chhungte an thi a, darkar tam tak hnuah ka hre chauh va. Khaw tam tak a chhia a ni,” a ti.

Hmun kilkhawrah chuan helicopter hmangin hliam tuar leh ruangte chu damdawi inah phurh an ni.

Paktika province-a a tuar na ber district zinga doctor chuan thawktute pawh a tuartu zingah an tel teuh thu a sawi.

“Lir a nghin hma pawhin thawktu leh hmanrua kan indaih lo sa a, kan indaih lo lehzual hle. Kan thawhpui zingah engzat chiah nge dam pawh ka la hre rih lo,” a ti.

Thi tam ber hi Paktika-a Gayan leh Barmal district-a chengte niin tual chhunga doctor pakhat chuan BBC a hrilh a. Tual chhung chanchinbu, Etilaat-e Roz chuan Gayan khaw pum a chhe vek niin a tar lang bawk.

Lirnghing hi magnitude 6.1-a na niin lei hnuai km 51 vel atanga intan niin seismologist-te chuan an sawi.

A nghing hi Afghanistan atanga km 500 chuanga hla, Pakistan leh India-ah pawh hriat a ni a. Afghanistan khawpui, Kabul bakah Pakistan khawui, Islamabad pawh a sawi a ni.

Pakistan-ah erawh tihchhiat leh thi leh hliam an awm lo niin BBC Urdu chuan a tar lang.

Leave a Reply

Your email address will not be published. Required fields are marked *

error: Content is protected !!