Sipai bo thiin hmu

June 18 atanga chin hriat loha bo, Saipum Bankang Camp-a sipai duty, PC Malsawma, 1st Bn MAP, Mission Veng chu nimin khan thia hmuh a ni.

PC Malsawma hi kar kalta Inrinni tlai dar 2 vela an camp atanga a chhuak chu a let leh mai loh avangin Chawlhni khan Saipum khawtlang hruaitute leh Camp-a a awmpuiten an zawng a. Thawhtanni atang khan khawtlang huapa zawn tan a ni.

Khawtlang huapa zawn a nih atanga ni thum ni, nimin tlai khan Bankang Sipai Camp atanga Km. 1 leh a chanve bawr vela hlaa awm lengkir hnuaiah thia hmuh a ni.

Thudawn danin PC Malsawma hian kham hel a tumna lamah a tla ta nia rin a ni.

Thawhlehni atang khan bo zawnna hmun Bankang Camp chu Serlui bialtu MLA Lalrinsanga Ralte chuan a thutchilh nghal a, a bial chhunga vanduaina thleng chungchangah Saipum Branch YMA member-te inpekna leh tlawmngaihna chu chhuanawm a tih thu sawiin bial chhung mi ni lo mah se ram leh hnam tana police duty bo zawng tura feh chhuak Saipum nula leh tlangvalte chu an fakawm takzet a ni, a ti.

MLA hian mi bo zawng tura fehchhuak Saipum Branch YMA hnenah hian an mamawh tur buhfai bag hnih, dal bag khat, silpauline pali leh pawisa fai Rs. 10,000 a hlan.

PC Malsawma hian a nupui, Hmingthangmawii (Tetei) leh a fa pakhat a kalsan a ni, a ruang hi police-ten an enfel hunah post mortem-a, an veng Mission venga lak a ni ang.

Leave a Reply

Your email address will not be published. Required fields are marked *

error: Content is protected !!