Aizawl by pass road project chi hnih atana NHIDCL-in detailed project report (DPR) a peih fel thawkhat tawh a, August thlaah sorkarah thehluh an tum tih Adviser to Chief Minister (Technical) Er K Lalsawmvela’n a sawi.
The Zozam Times-in a kawmnaah Er K Lalsawmvela chuan Aizawl by pass road project chi hnih hi NHIDCL thawh tur a ni a, DPR pawh an kuta awm a ni tih a sawi a, “Project pakhat zawk, western side atana DPR hi August 1-ah thehluh an tum a, pakhat zawk hi August 31-ah rawn thehluh an tum,” a ti.
Aizawl by pass road project pakhat zawk, western side chu union budget-a Rs. vaibelchhe 500 lang, Sihhmui atanga MZU hnuai, Lawipui hnuai, Tlangnuam, Hlimen, Samtlang, Hualngohmun leh Melriat inkar kawng sial tur a nih thu Er Sawmvela chuan sawiin, hemi atana DPR hi August 1-a thehluh an tum chu a ni tih a sawi.
Adviser to chief minister (technical) chuan, “Project pakhat zawk hi Silchar atanga Four lane tawpna atanga intanin, Sairang kurung lui atanga Tuirial Airfield inkar kawng thar, km 28.9-a thui sial tur a ni,” a ti.
Kawng thar sial chu Rangvamual epah chhoin, Bawngkawn Brigade atanga Muthi ram chhuak turin km 2.40-a thui lei verh tur a ni tih a sawi a, he project zirchianna, feasibility report chu Zirtawpniah NHIDCL hian thehluh an tum tih a sawi.
Aizawl khawpuia Bawngkawn leh Vaivakawna, lirthei kal theihna tur fly over siam tur chungchangah erawh thawhhona thuthlung an ziahpui, Telecommunications Consultant India Ltd (TCIL)-in DPR an la buaipui mek tih a sawi a, eng hunah nge DPR hi an peih fel dawn tih erawh an sawi mai theih rih lo tih a sawi bawk a ni.