AIZAWL: Lawngtlai khawpui chhungah Vawk hri leng African Swine Fever (ASF) vanga Vawk thi 14 a awm tawh a, ASF vanga Vawk suat 29 a a awm tawh bawk.
Nimin khan Lawngtlaiah Addl DC James Miahlung hovin state sorkar leh Lai Autonomous District Council (LADC)-a AH&Vety hotute, sorkar official dangte leh Lawngtlaia VC/Village level response team aiawhte Lawngtlai Vawk natna hri leng ASF chungchanga hmalak zel dan tur ngaihtuahin an ṭhu khawm a. VC te chu ASF laka himna tura sorkar leh department hmalakna theihtawpa puibawm tura ngen an ni.
Hmalakna tur hrang hrang an ruahman zingah, Lawngtlai khawpui chhunga Vawk talh tur, AH& Vety mithiamte aṭanga certificate nei te pawhin an talh hmain an awmna veng VC-ah report hmasa zel se, an ti a. ASF chungchanga mipui leh Vawk vulhtute hriat tur pawimawh puanzar tur state leh LADC-a AH&Vety department lamin lo siam se tiin, VC ten an veng huam chhungah hmun dang aṭanga Vawk lalut an hriat chuan a rang lamin DC-ah report thehlut ṭhin se, an ti bawk.
District administration report-a a lan danin, Pangkhua lama DC thupek bawhchhiaa Vawk lakluh nia hriat chu police-in an chhui mek a. a. Tunhnaia Lawngtlai khawpui chhunga Vawk la lut nia rinhlelh mi pathum chu police-in an chhui chian hnuah pathum zinga pahnihin an la lut ngei tih finfiah niin, hrem an nih theih nan chak taka hmalak mek a ni.