Madhya Pradesh-ah inchiuna pakhat hmangin zirlai 30 zet hnenah vaccine pek an ni a, hemi chungchang hi damdawi in thuneituten an chhui zui mek.
Sagar district-a sikul pakhatah zirlaite hnena Covid-19 vaccine pek nan inchiuna an inhman tawmtir a ni.
India-ah hian health ministry chuan Covid-19 vaccine pek nan hian ‘hriau pakhat, inchiuna pakhat, vawi khat chauh hman’ tih chu tih dan tur an zam a ni.
India-ah hian vaccine hi dose tluklehdingawn 2.03 chuang an pe tawh.
Vawi khat hmana paih mai thei inchiuna (single-use disposable syringe) hi natna inkai a awm loh nan India-ah hian hman uar a ni a. Hetih lai hian tun hma lam pawhin hmanraw indaih lohna avangin inchiuna hman nawn hi a awm nual a ni.
Naupangte hnena vaccine petu, Jitendra Rai chuan health department atangin inchiuna pakhat chauh a dawng a, thupek erawh a zawm tih thuthar lakhawmtute hnenah a sawi.
Vaccine an laknaa naupangte kalpuitu nu leh paten inchiuna hman tawm chu an hmu a, sikul thuneitute hnenah an thlen ta a ni.
Sorkar thuneituten sikul an thlen chuan Rai-a hi a lo awm tawh lo va, a phone a tihlum daih bawk.
Health department chuan a fimkhur loh avangin a lakah thubuai an ziak lut a. Hetih rual hian invenna pek buaipuitu, a hmanruate thawntu chu chhui a ni mek bawk.
Eptu, Congress party chuan state health minister chu a bân nghal an phut.
India hi China dawta Covid vaccine tluklehdingawn hnih pe hmasa ber a ni a. July-ah hian sorkarin India-in zalenna a neih kum 75-na pualin ni 75 chhung a thlawna puitling chin tana booster dose lak theihna hun a hawng bawk.
Health ministry chuan puitling zinga 98% chuan Covid vaccine hi dose khat tal dawng tawhin 90% chuan dose bikimin an dawng tawh bawk tih a sawi.