Aizawl: Mizo Grammer Society-in lehkhabu an buatsaih, ‘Mizo tawng ziah dan dik’ tih chu Education Minister Lalchhandama Ralte chuan nimin khan a office-ah a tlangzarh a, thangthar zinga tawng ziah dan dik hre lo an tam chhan chu Mizo tawng dik taka hman dan tur zirtira kaihhruaina an hmuh loh vang a nih thu a sawi.
Lehkhabu tlangzarh inkhawm MGS President R Lallawmzuala kaihhruaiah hian education minister chuan social media-ah Mizo tawng hman dan dik lo a tam a, thangtharte zingah tawng ziah dan dik hre lo an tam tawh tih leh Mizo tawng an pawngsual nasa tih a sawi a, “Heng hi a chhan chu inthlahdah vangte a nih rualin naupang tam zawk chu English medium-a lehkha zir, subject pakhata Mizo tawng awm ve hram hram, tawng dik taka hmanna kawnga kaihhruaina an hmuh loh vang a ni,” a ti.
Education minister chuan khawvel hriata Mizo tawng pho lan a nih theih nan sorkarin hma a la zel a, Mizo tawng tihmasawn te, hnam inpumkhatna tura Mizo tawng pawimawhnate hriain a tihhausaka tihlar hi hnam anga ram lak nan a tul tih sorkarin a hria tih a sawi.
MNF sorkarin tawng humhalh a ngai pawimawh a, SED Board 14 din a lo nih khan HRD pawh din a ni a, he board hnathawh tur zingah hian chief minister-in Mizo tawng humhalh leh tihhausakna tur atana hmalak hi a sawi tel tih a sawi a, “Chumi bawhzuina kal zelah chuan Mizo Language Development Board (MLDB) din a lo ni ta,” a ti.
“MLDB chu gazzette-a chhuah a nih hnuah law department pawmpui turin thehluh a ni tawh,” a ti a. MLB Office tur pawh tihfel a ni tawh a, MYC office hlui chu an luah dawn tih sawiin chairman leh secretary turte pawh hun reilo teah tihfel a ni dawn tih a sawi.
Mizo Grammar Society hruaitute chuan an lehkhabu chhuah chu Mizo tawng ziah zawm leh zawm loh tar lanna a ni a, dictionary anga hman tur a ni tih an sawi a, grammar behchhana ziah a nih avangin an lehkhabua an tar lante chu inhnialna a lo awm a nih pawhin sawihona neihpui an inpeih reng tih an sawi a ni.