MPCC Vice President Lal Thanzara chuan ram sum leh pai enkawl lama mi thiamte hi khawvelin a ngaihsang a, chutiang mi chu Mizoramin a nei a, chu chu Congress President Lalsawta a ni tih a sawi.
Congress Bhavan-a party chhung inkhawm nimina neihah thu sawiin Lal Thanzara hian ram hmasawnna bul a nih tlat avangin sum leh pai enkawl lama mi thiamte hi khawvelin a ngaisang a, Mizoram pawhin chutiang mi chu a nei tih sawiin, “Chu chu kan party President Pu Lalsawta hi a ni a. Sum leh pai enkawl thiam, ei ruk laka fihlim, mi zawng zawng pawhin mi thaa an ngaih hruaitu (leader)-ah kan nei a ni,” a ti.
Lal Thanzara hian tunah hian ram sum leh pai enkawltuten duhdah taka ram an hruai avangin harsatna ramin a tawk a, sorkar sum harsatna avanga sorkar hnathawk hlawh lak hun tur a la hriat theih rih loh tih thuten chanchin thar a luah reng ta mai chu pawi a tih thu a sawi.
Hnam fing hmasa, Greece leh Sri Lanka pawh sum leh pai enkawl thiam lo ram hruaitu an nei a, an neih ang ang an chen a, insiam that an tum lo a, leiba thangah tangin tuna an ram leibate chu thangtharten an la rulh tauh tauh a ngai dawn niin a sawi.
MPCC Vice President Lal Thanzara hian Congress sorkar kal tawhah khan sorkarin sum harsatna a tawk lo bik lo tih sawiin, sorkar lai tan chuan mualphona anga ngaih theih ni mah se, finance minister-ten mipui laka a lema insawi mam leh thup tum loin thil nihna tak zep buai loin, inrenchem a tulzia hriain sutkian dan ngaihtuahin sum dinhmun siamtha turin theihtawpin a thawk mai thin tih a sawi.
“Mizoram sum dinhmun kha Congress sorkarin theihtawpin kan siam tha, duhthusam ni lo mah se, ‘a tichhetu nih aia a siam thatu’ nih kan tum a ni. Kum 10 chhunga theihtawpa sum dinhmun kan siam that kha MNF sorkar chuan kum thum chhungin a tichhe vek a, siam that nan hun a duh rei tehlul nen, a tihchhiat nan hun a duh rei lohzia he MNF sorkar hian a tichiang a ni,” a ti.
Ramin sum harsatna a tawh chiang taka a lan laia thupha chawina emaw, mipui hnena ngaihhnathiam dilna lam emaw sawi a hnek a, finance enkawl thiam anga chief minister leh finance minister ni bawk fakmawi tuma tankhawh hian Mizoram mipui rilru na takin a hliam niin a sawi.
Sports Minister Robert Romawia’n sorkar laipuiin a nawrna avanga Mizoram sorkarin ni hnih khat lek chhunga CSS sum Rs. vaibelchhe 600 chuang a release ropui a tihzia a sawi leh sorkar sum dinhmuh tha anga a sawi chu, a sawi ang a nih chuan sorkar hnathawk hlawh hreng khawtlai lo se la; health care sum ba peksak thuai se, contractor bill tang zawng zawng pe se la, kum khat hnuah pawh pension pawisa la thei lote hi a rang lama pe thuai tur leh, mipui phurrit electric bill bakah tui bill sang lutuk tihhniamsak thuai turin a ngen tih a sawi.