Everton chuan kar hmasa atanga sawizawm an nih hnuah Burnley winger Dwight McNeil chu an lalut fel a, kum nga contract ziahpui in Pound maktaduai 20 velin an lalut.
McNeil hian Clarets tan vawi 140 inkhel hmanin kum 2018 atangin Premier League match hnih chauh khelh loh a nei.
England Under-21 international hlui hi Everton in tun nipui a player an lakluh pathumna a ni a. Burnley a a teammate thin James Tarkowski leh Ruben Vinagre te hnung a zui.
Kum 22 mi chuan, “Ka insawnna ka tifel thei hi ka lawm hle. Everton in min ngaihven tih ka hriat veleh khan insawn ka duh nghal a, club tha, team tha tak duan tum an ni.”
“Manager Frank Lampard-a hnuaiah ka statistics te langsar zawk a, ka tihpun theihna turin min kaihhruai theih ka ring a, hmasawn hi ka duh a ni.”
McNeil hian season liamta khan Premier League-ah ‘dribble’ hlawhtlin lamah pahnihna a ni a, cross tam ber pathumna a ni bawk.