- Lallunghnema, Charity Lodge
Mi tam takin Party Politics khela Mizoram an inhmangaih siak laiin keini mi tlem te te chuan consumer politics kan khel a. Consumer Politics ka tih hian nitin, chhungkaw tin min huap mek laiin consumer politics khel tih tham kan awm lova. Politics lemchannaah mi tam tak tunah hian an inham buai mek a ni. Mi tam tak chuan hlimna zawngin an pension hnuah Politicsa zuang lutin nitin an tei chhuak ve a ni awm e.Politician vu vuk kheltute chu anmahni party fak mawinain an khat a, ram mipui an inhmangaih thuk siak a. Mahse ,anmahni tan bak an khel lo, tih hi mipui sawi duh dan a ni.
Keini Consumer Politics kheltute erawh hi chuan sawi mawi tur kan nei ve lo va, fak mawi tur kan hre ve hek lo. Kan sawi uar ber chu Consumer Justice hi a ni mai. Ziaka dan awm sa, a keng kawhtuten an kenkawh that loh avanga consumer te tuarna leh an thil hriat tlem avanga an tuarna hi nitin a thleng reng a ni. Kan that chhiat luat avanga kan tuarna te hi a theu nei lo hle a. Kan mawl luat avanga kan tuarnate hi sawi thiam theih pawh a ni lo.Changkanna dikah kan changkang lova, hmasawnna kawng dik kan zawh hek lo. Mahse kan zak der si lo. Kan ngaihsan zawng mihringte chu thu sawi huai, ziak huai, boruaka mi ngaihtuahna hruai lungleng thei apiang a ni a. Consumer-ten an dikna leh chanvo sual chhuahna kawnga hma la tur reng kan hmu lo a nih hi! Tun hun thlenga Power & Electricity bill kalphung hre lo, hriat tum lo, LP Gas sem leh pekchhuah chungchanga tlar hnih tal pawh sawi thei lo mi thiam zinga an la zi khup mai hi chuan lung a ti awi mawlh lo ve.
Sawi leh sawi hnu, kan sawi zing ta mawlh mawlh e Gas la tura intlar put thinte put te, kawlphetha bill dan hre miah lo, tui bill dan hre miah lo, air ticket refunding thua tlan ngaihna reng hre lo mihring inti celeb zinga hmuh tur tam lutukte, party politician thusawi thiam tak minister ni mai thei dinhmuna ding consumer right hre miah lo. Pastor leh Upa zinga consumer right bengkhawn na chang hre lo a za tel awm thin hian he thuziaktu hi a tilungngai thin a nih hi maw le!
Inchei nalh tak, changkang satliah lo, NGO a inhmang tak consumer te dikna leh chanvo hre hauh lo hmel han hmuh hian lung a awi thei meuh lo a ni e. Ka han ang deuh a nih hi, U Thang !. A tul a nih hi!
Kan thu leh hla te hian kawng ro su se, ka ti hle mai. Chhiartu in tam emaw in tlem emaw Consumer Huang hi kan bahlah thiang lova, kan chawlhsan thiang hek lo. Ka ziak a, ka ziak zel ang. Chhawrtu pawh an awm zel ka beisei. He column avanga mi enge maw zat an lo zia awm phah hrim hrim hi ka lawmna ber a ni tlat!
Lal Isua’n a Pa duhzawng tih chu a chaw tui ber a ni, a tih angin keini hi chuan eng dinhmunah pawh dingin, eng pawh ti ila, consumer te chanvo humhalh a nih dawn phawt chuan eng pawh kan huam a nih hi! Kan chaw tui ber a ni.Engmah ni si lo hian ve ngawt a! I lo ti a ni mai thei e. Mahse… kan hmalaknaah hian lawmna kan nei reng a. Kan lawm em em rih a ni!
Bus conductor, mi dangte tana luang chhuak, driver fel tak, mite tana inpe chanchin ka ziahte kha lo hre reng ang che u. Entawn tur min hnuchhiah a ni. Ka rawn sawi pakhat Bank pakhat chet fuh loh chungchangah khan,khatiang thil kha hmun tam takah mi hrang hrang hminga loan inpekte, hming neitu zawn chhuah theih loh, loan latu ni lo hnena loan ba thinna(recovery letter) pek hi sawi tur an tam viau thin. Bank a thawktute pawh hi an fimkhur a ngai hle a ni. Mi tam tak tih chiaina leh tih manganna a ni a. Chuvangin Mizoramah pawh hian mitin kan fimkhur a ngai a ni.
Tun tumah hian khawi hmun maha thil thleng zen zen ngai lo kei pawhin ka la hriat ngai loh, vai rama Super Market pakhat pawisa chawi tura hrem a nih thu ka rawn chhawp chhuak mek a. He thu hi Consumer Advocacy Group a member pakhat ‘shared’ a ni a. Hetiang hi thil thlen dan chu a ni a. Kum 2014 daih tawh, October thla khan vaipa D. Jaipal Reddy chuan Heritage Jam Bottle 2 super market pakhata mi a lei a. Buy one, get one policy offer a nih avangin thil tih chi tak pawh a ni. Mahse vanduaithlak takin jam bottle pakhat zawkah chuan khuai(bee) a lut hlauh mai a. Hetiang hian sap tawngin sawi chhuah a ni a. “Dead bee in jam bottle at super market Rs. 20000/- in fine. After a seven year legal battle, Heritage Foods Ltd. was told to pay legal cost of Rs. 3000/- to the aggrieved customer by the State Consumer Commission,tiin . Hemi hma hian Ranga Reddy Dist. Commission chuan thutlukna lo siam tawhin Company hi Rs. 20000/- chawi tur leh Heritage jam bottle 5 chawi bawk turin a lo ti tawh bawk a ni.. Mahse State Commission erawh chuan bottle 5 chawi tir chu a hnawl ta thung a ni. Jam emaw tui emaw awmna bottle chhunga thil dang lo awm hi ‘foreign object ‘ tih a ni awm e. State Commission chuan,’Customer would not capture a bee for the purpose of planting it in a bottle’ a ti hial a ni. Restuarantte,Hotelte leh Thingpui Dawrte hi Services Provider an ni a,unfair trade an practise thei bawk a ni.Customerte hriselna leh himna chu an ngaih pawimawh ber tur a ni.
Restaurant-ah te, hotel-ah te, thingpui dawrah te eiin in i chawl a, I thil ei turah chuan foreign object a awm a thiang lo a ni. Hetianga in tur emaw ei tur emaw a thil dang a lo awm chuan dawr neitute chuan CPA 2019 an bawh chhia a, customer te hriselna atan pawh a hlauhawm thei. Tho phei chu a tla tur a ni lo hrim hrim a. Kan fimkhur a ngai em em a ni. Hotel, Retuarant leh Thingpui dawr neitute leh Consumer te i harh ang u. Ei in tur thianghlim leh tha kan ei a kan in theih nan restaurant te, hotel te, thingpui dawr neitute lo fimkhur rawh se.