Aizawl : Kolasib Bawrhsap John LT Sanga’n nimin khan Govt. Kolasib College-a zirlai lut thar 234 te lo lawmna inkhawm hmanpuiin, zirlaite chu social media hman chintawk hre tur leh zirna pawn lam thila inhmang tam lo turin a chah.
Kolasib Bawrhsap chuan college chu thiam thil thar chherchhuahna atan te, inelna thianghlim hmanga thiamna tihpun nan te leh zirna hmanga finna tihpunna atan tea hmang turin zirlaite chu a chah a. Tum mumal tak neia, chumi tihlawhtling tura rilru nghet tak nei chunga college-a an hun te tangkai taka hmang tur leh nun uluk tak chunga malsawmna dawng tlaka an hun te hmang turin a chah bawk.
Govt. Kolasib College hian Malsawmdawngliani hnenah NSS Volunteer of the Year award 2021-22 an hlan a. Zirlai lut thar aiawhin Ricky Lalpekhlua’n lawmthu sawiin, SU, Asst. GS Lalremthanga'n thu a sawi bawk. Govt. Kolasib College-ah hian zirlai 720 vel awm mekin, subject hlawm 14 a awm a, zirtirtu 58 leh thawktu dang 18 an awm mek a ni.