Aizawl: MNF Adviser K Lalrinliana, supply minister chuan nimin khan Mizo Hnam Runa party chhung inkhawmah thu a sawi a, MNF-in sorkar an chelh tan atangin ration-a sem chhuah tur Mizorama thar ngei buhfai lei duh mah se tun thlengin sem tham lei tur an la hmu lo tih a sawi.
K Lalrinliana chuan an sorkar hlim khan chief minister hoa an rel angin ration-a sem chhuah tur Mizorama thar chhuah ngei buhfai lei an tum tih a sawi a, “State pawna mi kan lei ang zata lei kan duh thute pawh TV kaltlangtein kan tlangaupui,” a ti.
Society pakhatin buhfai lei tur an neih thu an thlen tih a sawi a, hetihlai hian Mizoramin thla khatah buhfai quintal nuai khat chuang a mamawh laiin buhfai lei tur nei society-in an neih chhun an lei tak erawh quintal 23 chauh a nih thu a sawi.
Kolasib district chhunga rice mills pawhin buhfai her tur an hmu zo mang lo tih sawiin, “Anni hnen atang hian sorkarin quintal 10,000 vel tak lei tur in nei em kan ti a; mahse chung pawh chu a la harsa rih a ni,” a ti.
Tun dinhmunah chuan Mizorama lo neitu tam zawkin an ei khawp buhfai an thar lo a, Mizoram chu buhfaiah a la intodelh lo hle tih a sawi a, chutihrual chuan ration sem turah erawh harsatna a awm lo, state pawn atanga chawk luh erawh a tam a, eng emaw thut lo thleng mah se thla 3/4 ei chu kudam tinah dah khawl a nih thu a sawi.
Supply minister chuan tuialhthei dah khawlna, oil depot siam tura sorkar hmalakna sawi bawkin, “Tun dinhmunah hian study team-ten oil depot hmun tur hi Bairabi leh Sihhmuiah ram an en mek a, thutlukna an siam fel thuai kan beisei,” a ti.
Study team member pangaten an tih tih chu an thlan mai tur a ni dawn tih a sawi a, an hmun tur hi an thlan fel atanga thla thum hnuah chuan hna an tan theih an beisei a, a hmawr an bawk tan a ni ber tih a sawi.
Eirawngbawlna gas chungchang sawi zawm bawkin, Mizoramin gas bottling plant a neih tilian tura hma an lak mek thu a sawi a, tun dinhmunah ni tinin Mizoramah gas trip 23, cylinder 7,000 vel phurh luh ziah a ni a, sorkar hnuaiah kawngpui a that miau avangin state pawn atanga gas lak luh kawngah harsatna a awm lo tih a sawi a; sorkar hmasa hun lai aiin gas chawk luh chu a tam zawk tih a sawi bawk a ni.