Indian leh Chinese sipai, People’s Liberation Army (PLA) hian ni 73 chhung chu Doklam tri-junction an tih, ram hnih bakah Bhutan intawh khawmna laiah hian inhmuh thiam lohna an nei tawh a. Hei hi Bhutan-in a ram chin tia a chhal chinah China-in kawng sial a tumna vang a ni.
Nikum October thla khan Bhutan leh China hian inremna ziakin hetah hian thawh thum (three-step roadmap)-a ramria an inrem lohna chin fel dan tur an ruahman.
Bhutan leh China hi km 400 chuang inri niin vawi 24 chuang zet ramria an inmil lohnate sawi fel tumin dawhkan kilin an lo inbe tawh.
Doklam tri-junction an tih, ram pathumte an intawh khawmna lai pawh hi India tan pawh a ram a him theih nana China chetna ngaihven a ngaih zualna lai hmun a ni.
India-China hi kum 2017-a Doklam tlang chung zawla an intihbuai tum khan nuclear ralthuam nei ram pahnih inkarah indona a chhuah mai hlauhthawn hman a ni a. Bhutan chuan heng lai hmun hi a ram niin a chhal a, hei hi India pawhin a pawmpui.
India chuan Doklam tri-junction-a China-in kawng a sial chu a duh lo hle a, ram pathumte himna tiderthawng thei a nih thu a sawi.
Doklam-a India-China inepna boruak hi vawi tam inbiak hnuah a fel thawkhat tawh a; mahse, inremna tak tak erawh a awm thei lo.