Party dang aia danglam ngam a hun tawh a ni
MNF vice president Vanlalzawma chuan party dang aia an danglam bikna a lang tur a nih thu kartawp mai khan sawiin, an contract leh hnathawh hrang hrangah party dang aia an danglam bikna miten an hmu tur a nih thu a sawi a, sawi maia tawp lovin, zawm atan pawh a tha hle.
Democracy ram, hruaitu inthlang ram kan nih angin kan ramah ngei pawh political party hrang hrang an awm a, heng mite hian sorkar siam ngei tumin inthlan apiangin theihtawp an chhuah ziah bawk. MNF vice president sawi ang hian mahni theuh inenfiah nan hmang thei hlawm ila a tha hle.
Hetiang sawi thei tur chuan mahni lam kan fihlim leh kan confi’ hle a ngai awm e. Tin, chutiang zelin a sawitu ngei pawh hi tlawmngai pawl hruaitu a nih lai atanga fak hlawh leh, dam dup mai niin a lang a, party-a a dinhmun thleng hian chu chuan thui tak a vawrh ni pawhin a lang.
Kan ram leh hnam kan hmangaih tak zet a nih chuan kan hnathawh leh kan thiltih engkimah hian party dang aia kan fihlim bik leh kan danglam bik hi a tul a, tute pawhin sorkarna lo siam se, kan danglam ngam tur a ni bawk. Mahni theuh inenfiah nan i hmang zel ang u.