Aizawl: Inrinni kalta khan Saipuma ZPM East Block political training hmanpuiin ZPM Working President K Sapdanga chuan tuna Mizoramin a mamawh ber chu chief minister mumal a nih thu a sawi.
K Sapdanga hian tuna ramin a mamawh ber chu chief minister mumal a nih thu leh Zoram hian Kamrula budget ni loin kuthnathawktute thlai thar hralhna tur price support a mamawh zawk niin a sawi a. “Kawng chhawng sarih pawh siam ila kan hmunphiah leh kan kuhva hralhna tur kan hriat si loh chuan engmah a ni lo,” a ti.
ZPM working president hian ZPM auhla chu kuthnathawktuten eizawnna ngelnghet an neih theihna tura puih hi a nih thu leh ZPM a sorkar chuan an hna hmasa ber tur chu kutthnathawktute dawmkan a nih thu a sawi a. Kuthnathawktuten ngelnghet taka ei an zawnna tur, a thawkrim apiangten thlamuanna leh hlawkna an neihna tura ram siam a pawimawh thu a sawi.
ZPM bultanna leh tun hnu thlir let hian an party hmasawnna hi a phurawm hle a, Zoram mipui insehmur dan thlir hian ZPM nih a hlimawm hle tih a sawi a. Nakkum inthlanah candidate-te ei tumna rilru pu loa puih tumna rilru an pu tlatte chu chung lam hnathawh a nih thu a sawi bawk.