MNF chuan African Swine Fever (ASF) leng darh zel tur venna atana vawk an suatsak chhungkuate tan zangnadawmna pek tur chu AH&Vety department kutah awm vek tawhin, rokhawlhna a awm loh chuan August 15, 2022 hmain sem vek a nih tur thu an sawi.
An thuchhuahah MNF hian vawk vulhtuten vawk an vulh kg 15 chinah Rs 2,200, kg 40 chinah Rs 5,800, kg 70 chinah Rs 8,400, kg 100 leh a chung lamte tan Rs 12,000 atanga Rs 15000 chu uluk taka zangnadawmna an dawng thei dawn niin an sawi tih an tar lang.
District hrang hrang - Aizawlah vawk 1,058, Lunglei-ah 220, Hnahthial-ah 140, Saitual-ah 56, Siaha-ah 50, Serchhip-ah 744, Mamit-ah 220, a vaiin vawk 2,488-te suat a nih thu leh, district hrang hrangah - Aizawl tan Rs 4,00,68,200, Lunglei tan Rs 78,37,400, Hnahthialah Rs 35,21,000, Saitualah Rs 15,31,200, Siaha-ah Rs 12,51,800, Serchhipah Rs 2,25,53,400 leh Mamit-ah Rs 2,80,79,200, a vaiin Rs 10,48,42,200 te chu zangnadawmna pek tur an nih thu an tar lang bawk.
Zangnadawmna sum pek chhuah turte hi AH&Vety department kutah a awm vek tawh nia sawiin, tih tur tul zawng zawngte tihfel a nih veleh District Veterinary Officer-ah pawisa hi transfer a ni ang a. District officer-ten beneficiary account-ah an dawn tur zat theuh an deposit ang a. Rokhawlhna lian tak a awm loh chuan pawisa hi August 15, 2022 hmain sem vek a nih tur thu an sawi.
MNF party hian state dangte hian mumal taka vawk suat an kalpui ve lo tih sawiin, Mizoram chauh hi vawk suat zangnadawmna dawn tur awmchhun a nih avangin AH&Vety Minister Dr K Beichhua hmalakna chu an chhuang tak zet tih an sawi a. Zangnadawmna sum mamawh zaa 50 chu sorkar laipui tum tur a nih thu leh a lo dolet nan zaa 50 chu Mizoram sorkar tum tur a nih thu an sawi bawk.