Khawthlangtuipui Group YMA huaihawtin Inrinni khan Tlabung leh Lunglei inkalpawhna, National Highway 302 chhiat zualna lai, Sihphirtlang leh Tuichawng inkar chu thawm that hnatlangpui neih a ni.
NH 302 kawngpui sial that mek hi lirthei zawh hleih theih lohin a chhe nasa a, tun hnaiah kawng chhiat vang nia ngaihbel theih tur thihna a thleng bawk a. He thil thleng avanga July 28, 2022-a Khawthlangtuipui Group YMA leh Tlabung khaw chhunga branch YMA hruaitute thukhawm chuan hnatlangpui neih hi an rel a ni.
Hnatlangpuiah hian YMA member bakah hnam dang tiamin mi 500 chuang an thawh chhuah bakah Tlabunga lirthei neitu inzawmkhawm pawl hrang hrangin lirthei 30 chuang an thawh chhuahpui bawk a, kawng khuar leh a diak zual thinna lai chu a theih ang anga hnawhin, harsatna tawk loa lirtheiten an zawh theih turin an thawm tha zel a ni.
Tlabung atanga thudawn danin NH 302 hi National Highways & Infrastructure Development Corporation Limited (NHIDCL) enkawlna hnuaiah, nikum kum tawp lam atang khan sial thata laih zauh mek a ni a. Hetihlai hian Mizoram hmun danga kawngpui dang sial that ve thote ang lo taka lirtheia zawh hleih theih a nih tak loh avang leh hemi tih loh Tlabung leh a chhehvelten châk lakna kawngpui dang zawh tur an neih si loh avangin, thla eng emaw zat chhung chu ni tin deuhthaw lirthei an tan phah thin a ni.
Tun hnaia fur ruahtui a tlak vanga NH 302 hi a chhiat belhchhah hnuah helai kawng zawh hian kar kalta Ningani atang khan Tlabunga lirthei eng chi mah an tlan ngam tawh lo a ni.