Aizawl: National Highway 150 kawngpui laihnaa leiminin kawng a tihpinte hun tiam chhunga tihtlang a nih loh avangin Khawruhlian khuain nimin khan darkar 7 chhung Mizoram hmar lam tlangdung panna kawngpui an dang ping a, an thil phut tihhlawhtlinsak tiam an nih avangin nimin vek khan an nawrhna hi an titawp.
NH 150 kawngpui hnuaia Khawruhlian khaw hnuaia laih chu a min a, hemi avang hian kawng pingin hun rei tak chhung chu mipui ni tin mamawh phur lirthei a kal thei lo a. Hemi chungchangah hian Khawruhlian All NGO Coordination Committee (KANCC) chuan July 12, 2022 khan kawng thawm tha turin sorkar an ngen a, an phut a hlawhtlin tak lohah chuan nimin zing dar 5 atang khan kawng hi an dang ping ta a ni.
Kawngpui dang chattu Khawruhlian khaw mipui chuan phut hrang hrang an nei a, Khawruhlian luhna leh chhuahna tha taka laih tlang ni tawh se, side drain tha taka siamin, GSB phahin khawl hmanga tha taka chil mam ni rawh se, leimin mai hlauhthawnawm laiah lungrem ni rawh se tih leh khaw luh leh chhuahna August ni16 hmaa laih tlangte an phut.
Heng an thil phutte hi PWD-in tihhlawhtlinsak an tiam hnuah darkar 7 zet kawng dang pingtu mipuiin chawhnu dar 1:45-ah kawngpui an dan chu an titawp ta a ni.
Khawruhlian mipuite duh dan hi PWD hnuaia contractor ECI Company-ten hma an la dawn niin thudawn a ni.