MZP-in Cooperation deptt-a Addl. Registrar of Cooperative Societies (Addl. RCS), kumin May-a pension tawh Mizoram sorkarin a rawih nawnna tur order nimin khan an hal.
Mizoram sorkarin Addl. RCS pension tawh a rawih nawn hi Lalrinsanga niin a pension hnua sorkarin a aiawh tura a ruat, Maria G. Ralte pawh July thla khan a pension ve leh tawh niin MZP chuan an sawi.
“Sorkar hnathawk ruai nawn lo tura thuneitute kan ngen reng laia MZP ngenna ngai pawimawh duh lova sorkarin mi bik pawh ni lo, sum tam tak senga a ruai nawn lui hi thalai lehkhathiam hna zawng mekte zah lohna leh hmusitnaah kan ngai,” tiin, pension rawih nawnna chu sut turin sorkar an ngen nawn.
Sorkarin Addl. RCS pension tawh, Lalrinsanga rawih nawn leh a tumna kawngah hian mi mal induhsakna uchuak tak leh puanhnuai thil tam tak a awm nia an hriat thu MZP chuan an sawi a. Vawiinah pension tawh rawih nawn Lalrinsanga pisa kai tur chu an dang dawn tih an sawi bawk.
MZP President Lalnunmawia Pautu-in, “Mi bik leh thiamna bik nei pawh ni lo, mi mal induhsakna uchuak tak avanga sorkarin thawktu pension a ruai nawn hi thalaite kawng daltu a nih avang leh sorkar sum tam tak luan ralna a nih avangin MZP chuan kan ngaithiam thei lo,” a ti a. “Ruai nawn lo tura vawi tam kan ngen hnuah pawh pension rawih nawn kaltlangpui a ni hi kan dem takzet a, a tawp thlengin kan do zel dawn,” a ti bawk a ni.