Vairengte leh Sairang inkar National Highway No 6 & 306 kawngpui, four lane-a zauh turah, Vairengte atanga Kolasib inkar (Package 3 leh 4) huam chhunga ram tihchhiat tur neitute hnena zangnadawmna pek tur chu Competent Authority for Land Acquisition (CALA) kutah a awm tawh.
Kolasib district CALA, Addl. DC Lallawmawma’n Kolasib-a chanchinbumi thenkhat a hrilh danin NH-6 Vairengte leh Chhimluang inkar Package 3, NH-6&306 Chhimluang leh Kolasib inkar Package 4 huam chhunga four lane siamna turin ram a tihchhiat tur zangnadawmna chu pe chhuak mai thei an ni tawh a; sem chhuah hun tur tak erawh a la sawi chiang thei lo.
“Hemi rual vek hian Package 5 leh 6 pawh buaipui mek a ni tih sawiin, peih fel tep tawh a ni a; Package 7 lam erawh kawng kalna tur (allignment) tihchian a la ni lo,” a ti.
Thudawn danin, NHIDCL hian July 29, 2022 khan Vairengte - Chhimluang inkar (Package 3) leh July 30, 2022 khan Chhimluang - Kolasib inkar (Package 4) atan Forest Clearance dilnate chu Forest (Conservation) Act 1980 tlawhchhanin an thehlut chauh tih EF&CC Dept. chuan sawiin, enfiahna turin portal-ah pawh a la lut lo va, forest clearance hi EF&CC Dept. lam muan vang ni lovin, NHIDCL lam muan vang zawka la nei lo an ni tih an sawi.
Tar lan tawh angin four lane siam hna viltu, NHIDCL chuan Kolasib district chhunga package hrang hranga hnathawktu tur contractor-te a la fel vek tawh a; heng contractor-te hian hna thawk mai thei turin an inbun lawk tawh a ni.