Liverpool forward Diogo Jota chuan kum 2027 thleng Anfield a cham turin contract thar a ziak.
Kum 25 mi Portugal international hian kum 2020 a Pound maktaduai 41b a Wolverhampton Wanderers atanga Liverpool hi a zawm hnuah an tan match 85 khelin goal 34 a khung tawh.
Season liamta khan Liverpool tan inelna hrang hrangah goal 21 a khung a. FA Cup leh EFL Cup an chawi theihna chhan a nih bakah Premier League leh UEFA Champions League a pahnihna an nihna kawngah a tangkai.
“Club thlirna atang chuan an rinna nghahna tlak player ka ni tih lantirna a ni. Kum hnih kalta a he club ka zawm atangin player pawimawh nih ka tum nghal a, a tir atanga ka tum sa a ni.”
“Nikum anga inelna apiangah hlawhtlin tuma kan beih ang kha vawikhat tawn tawh chuan khatiang boruak kha tem leh ring kan duh a, a aia tha zawka chet kan duh zel a ni.” tiin contract a ziah chhan a sawi.
“He duhna hi keimaha a len ang bawkin ka teammate leh kan staff zawng zawngah a lian a, tihlawhtling turin kan bei tur a ni.” a ti bawk.
Manager Jurgen Klopp chuan, “Striker ni chungah wing a khel thei a nih avangin duhthlan tur min siamsak a tha hle a. Liverpool a zawm hnuah hma a sawn nasa.”
“Diogo laka kan beisei hi ka sawi tawh thin a, kan beisei a khum chiang hle a, chuvangin hmalam pan dun zel hi kan duh a ni.” tiin a sawi.