BJP worker-te chuan TMC national general secretary Abhishek Banerjee-a leh amah zuituten Agartala thlawhna tumhmun atanga Tripureshwari temple an pan tur chu hmun eng emaw zatah dan an lo tum niin police chuan an sawi.
Banerjee-a leh a thuihhruaite hi West Tripura district-a Charilam-ah BJP worker lo inhawr khawmin lo dangin an lo au khum a, kawng dan an tum bawk.
BJP worker-te hian Banerjee-a car hi an party flag ngulin an lo vua nia sawi a ni a; mahse, lirthei erawh a chhe lo niin police chuan an sawi.
Banerjee hian a hnuah thil thleng chu Twitter-ah a video nena dahin, “BJP-in ro an relna, Tripura-a mipui rorelna a nih hi! Hetiang dinhmuna i siam thei hi Biplab (Kumar Deb), i titha e,” tiin tiel takin a tar lang.
BJP worker-te hian Sipahijala district-a Kamalasagar-ah pawh lo dan an tum leh a; mahse, a kaltlang thei.
Udaipur-a Tripureshwari temple a thlen hian BJP worker-ten lo dan tum lehin, “Haw rawh Abhishek,” tiin an lo au khum bawk.
TMC tantute pawh temple bulah hian an au rual a, hei hian boruak pawh a tisang hman hle a. BJP Gomati district president Abhishek Debroy chuan an mite chu kalsawn tura a tih hnuah a zia ta chauh a ni.
An kalsawn hnuah hian Banerjee-a pawh temple-ah a lut thei chauh niin police chuan an sawi.
Banerjee hian he state-a TMC hruaitute kawmin Agartala-ah thuthar lakhawmtute a kawm bawk ang.