Pelosi-i hi Asia ramte tlawhin Pathianni khan a chhuak a, a tlawh tur zingah Taiwan hi sawi a awm lo va. Singapore leh Malaysia a kal tawh a, South Korea leh Japan pawh a kalna tur zingah a tel.
Taiwan thliarkara a zin tur thu sawi ni lo mah se Taiwanese leh US chanchinbute chuan Thawhlehni zanah a thleng dawn a, Taiwan hruaitute nen Nilainiah an inkawm dawn niin nasa takin an tar lang.
Thawhlehni khan Taiwan Premier Su Tseng-chang chuan ram dang atanga tlawhtu apiang ‘lawm taka an lo dawnsawn’ tur thu leh ‘a tul ang zela ruahmanna pawh an siam’ tur thu a sawi.
Polosi-i’n Taiwan a tlawh hi White House tan pawh luhaina tham a ni tho va. President Joe Biden chuan kar hmasa khan US sipaite chuan Pelosi-i’n Taiwan a tlawh chu ‘tun dinhmuna thil tha a ni lo’ tih an sawi tih a sawi.
Thawhtanni kharn Kirby chuan Pelosi-i hian ‘Taiwan tlawh turin dikna chanvo a nei’ tih a sawi ve thung a, ‘ama thuin a tlawh’ niin a sawi bawk a. White House chuan US Congress inlak hranna (independence) chu a zah hle tih a sawi bawk.
Amaha Taiwan a din hi American vantlang zingah leh US Congress-ah pawh thlawptu an tam hrim hrim.
Democratic Party-a an hruaitu lawk, Pelosi-i hi hun rei tak ata tawh Chinese hruaitute sawisel nasatu a ni a, mihring dikna chanvo an palzut nasa niin a sawi thin a. Tun hmain mipui rorelna duh avanga sorkar beitute a lo kawm tawh a, 1989 massacre an tiha thite hriatrengna siam hmun, Tiananmen Square-a mi pawh a lo tlawh tawh.
April thla khan Taiwan hi tlawh a tum tawh a; mahse, Covid-19 a kai avangin a thulh a. Tun thla tirah khan, “Taiwan kan thlawp a ni tih lantir hi kan tan a pawimawh,” a ti.
Kirby-a chuan Pelosi-i hma hian Republican atanga House Speaker hlui, Newt Gingrich chuan kum 1997 khan Taiwan a tlawh thu leh kuminah pawh US senator zingah tlawh an awm thu a sawi.
“Engmah danglam a awm lo va, sawi tur pawh a awm lo. Tun hma pawha Speaker-in a lo tih ang kha tiin Taiwan a tlawh a ni mai,” a ti a. Pelosi-i chu US sipai thlawhna hmanga zin a nih thu a sawi bawk.