United States-a Kentucky khawchhak lam tui liana thi chu mi 37 an tling tawh a, ruah tam zawk an la dawn belh zel bawk.
Thi zingah hian naupang pawh paruk vel an tel a. An zinga pali chu unau, kum khat atanga riat inkar, an nu leh pate nena an insasengna lama tuiin a lakte an ni.
Kentucky Governor Andy Beshear chuan thi zat hi 100 an tlin theih thu a sawi a, chin hriat loh an la tam hle tih a sawi.
Chhungkaw 12,000 chuangin power an la nei lo va, chenna in leh sumdawnna hmun za tel tuiin a la chim.
Kawngpui, lei leh thil dang tam tak siam that leh nan pawisa maktaduai tel sen a ngai dawn tih governor chuan Thawhtanni khan a sawi.
Kartawpa a tuar nasa zual hmunte tlawhtu, Beshear-a chuan in ta tak tuiin a len a, sikulte pawh a chhe nasa tih a sawi.
Kum tam tak chhunga helai bialin tui lian a tawrh nat ber tum a ni.
Beshear-a chuan, “Ka dam chhunga ka hmuh tawha thihna leh chhiatna rapthlak ber a ni,” a ti.
Chenna in chhuahsantute chu park, biak in leh sorkarin a pek mobile home-ah an khawsa hlawm a. Mi 300 vel heng hmunah hian an awm tih thuneituten an sawi.
Beshear-a chuan mi thenkhat chuan an hak thlak chauh an nei a, “Engkim a chhe vek,” a ti.
A tuar na zual county pahnihah chuan thil ruk a tam nia sawi a awm avangin zan lamah curfew puan a ni.
“Curfew kan puang a; mahse, thil ru an awm chuan kan ngaizam mai mai lo vang,” tiin Breathitt County-a thuneitu pakhat chuan Pathianni tlai khan Facebook-ah a tar lang.
“Kan thenawm leh thianten thil tam tak an hloh va, an thil neihte an chân hi kan remti thei lo a ni,” a ti.
Kentucky-in tui lian an tawrh hi President Joe Biden-a pawhin chhiatna lianah puang tawhin sorkar laipui atangin puitu pawh thawn an ni ang.