Champhai district vigilance committee on fertilizer chu nimin khan an chairman Champhai Bawrhsap James Lalrinchhana hovin an thukhawm a. Kar hmasa Zirtawpnia dan lova leichi (urea) tawlhruk man, bag 500 vel chu endik nghalin, remchang hma- saah loneitute lei theih tura zawrchhuah an remti a. Sorkar dan dinglai angin bag 1 Rs. 450 zela hralh tur leh khairual zawka sem a nih theih nan mi pakhat tan bag 2 zela hralh ni se, an ti.
Dan lova leichi lakluh, kawl leh tawlhruk ven kawnga tanlak tul an ti a, approved dealer nilo te, state dang leh district dang qouta leichi tawlh a awm leh awm loh te, district qouta te pawh hmun danga tawlhruk a nih loh na tura thlithlai reng tul an tih thu an sawi a. Champhai district tana leichi supply tura pawm dealer 4 te chu district committee hminga dan leh mawhphurhna an neihte tha taka hlenchhuak tura ziaka hrilh ni se, an ti.
Champhai district tana leichi supply tura pawm dealer 4 te chu Leichi an chahluh zat, an kawl zat, an pekchhuah dan kimchang leh tuldangte thla bia report thin tur leh an dinhmunte tarlanna felfai tak signboard, hmuh mai theiha kudam-a tar tura hrilh ni se, an ti a. Hrilh lawk lova endik thin ni se, an ti bawk.