Nigerian tlangval kum 31 mi, Delhi-a Lok Nayak Hospital-a dah luh chuan Thawhlehni khan monkeypox a vei tih hmuh chhuah a ni tih union health ministry chuan a sawi a, ram pawna zin chhuahna a nei lo. Ani hi Delhi-a he hri kai pathumna niin India-a a pariatna a ni thung.
Union Health Minister Mansukh Mandaviya chuan Thawhlehnia parliament inkhawmah, “India-ah monkeypox kai pariat an awm mek a, an zinga panga hi ram pawna zinna nei an ni,” a ti.
Health ministry thuneitute monkeypox vei mi pariat zinga panga chu Kerala-a mi an nih thu an sawi a. Kerala-ah hian he hri vei pakhat chu Thawhtanni khan a thi nghe nghe.
Kum 22 mi hi Inrinnia thi tawh kha a ni a, United Arab Emirates atanga haw niin state thuneitute chuan monkeypox vanga thi ngei a ni em tih an chhui zui dawn tih an sawi.
Thawhtanni vek khan Nigerian kum 35 mi, ram danga zinna nei lo chuan he hri hi a kai tih finfiah a ni bawk.
Delhi sorkar chuan mi mal damdawi in pathum chu he hri kaite enkawlna hmun atan ruatin monkeypox isolation ward pawh an siam dawn a, hetah hian a kai tih finfiah leh rinhlelhte dah an ni ang.
Kailash Deepak Hospital, MD City Hospital, leh Batra Hospital-ah hian khum 10 theuh hauh a ni a, panga chu a kai finfiah leh panga chu rinhlelhte tana tih a ni.