United States House Speaker Nancy Pelosi-i’n Taiwan tlawh a tum mek laiin he thil duh lotu, China chuan tharum nena thliarkar laka inhrosak hnaih mekin boruak a tang hle a. Pelosi-i hi Thawhlehni zanah khan thleng tura inruahman a ni.
Polisi-i’n Taiwan a tlawh tur hi White House tirh a ni lem lo va; mahse, US thuneitu sangin kum tam tak chhunga he thliarkar a tlawh leh hmasak ber tur a ni.
Pelosi-i hi US sorkara chanvo sang ber pathumna chelhtu a ni a, hun rei tak ata tawh Beijing bei ngar ngartu a ni.
China chuan tlawk lo turin vawi tam a ti a, Thawhlehni khan a chet dan avangin US chuan a man a pek a ngaih tur thu a sawi.
Taiwan hi mahnia ro inrel hran a ni a; mahse, China chuan an province pakhata an chhal a ni.
Foreign ministry thupuangtu, Hua Chunying chuan China-in he intlawhna boruak a tan theih dan leh boruak a sosan theih dan chu US nen an sawi dun reng tih a sawi.
“US hian mawhphurhna lain China ram himna atana tha lo a nih phawt chuan a mawh a la ang a, a man a pe ang,” a ti.
Thawhlehni khan China chuan Taiwan Strait-a Taiwan nena an inthenna lai bawrah indo thlawhna a thlawh kualtir.
An sipaite pawh silai tak tak nen nunchan zirin an awm a, eastern command phei chuan video an tar lanah ‘eng pawh hmachhawn turin an inpeih’ tih an sawi.
Taiwan defence ministry pawhin an thliarkar bulah sipai an inlar nasa tih an sawi a, Chinese rumthaihna chu anmahnia hmachhawn an inpeih tih a sawi.
US hi China nena inpalai tawn ram an ni a, Taiwan nen erawh a hrangin an nei lo va; mahse, an inkungkaihna a tha a, official lem lovin nghet takin an inzawm tih an sawi.
Kar tirah khan National Security Council thupuangtu, John Kirby chuan China hian sipai chakna nena tihthaihin, Taiwan bul velah missile pawh a kap thei a, boruak leh tuipuiah pawh a sipaite a chettir viau thei tih thuthar lakhawmtute hnenah a lo sawi tawh.