Maharashtra-a Jalna district-a nu pakhat chuan an khuaah primary health centre (PHC)-a thawk doctor leh mi dangte an awm loh vek avangin a kawtah nau a hring.
He thil hi Wadigodri khuaa PHC-a Pathiannia thleng a ni a, thuneitute chuan Thawhtanni khan doctor pali leh thawktu dang palite chu an hrem nghal tih thuneitu sangin Thawhlehni khan a sawi.
District collector hnenah Dr Vithal Jadhav-a contract titawp tur leh health worker - V N Gaikwad leh T S Ahire te chu an hna atanga chawlhtir rih tura tih a ni tih district health officer (DHO) Dr Vivek Khatgaokar chuan a sawi.
Taluka Health Officer Kailash Kagne chu inthlahdah avangin chhui tura tih a ni a, thawktu dang pali hnenah insawi fiah tura tihna pek an ni.
Thawktute an hna thawhna hmunah hian an awm lo va, nu hian a kawtah nau a hrin phah ta ringawt tih a sawi.
Hetiang deuh chiah hi Dahipal khuaa PHC-ah pawh a lo thleng tawh a, he thil thleng pawh hi chhui zui mek a ni.
District chhunga PHC 44 leh sorkar damdawi in zawng zawngah thupek khauh tak chhuah zui nghal a ni a, an hnathawhna hmuna awm lo thawktute lakah hremna na tak lek a ni dawn tih hriattir an ni.