- Ruata
Mahindra Scorpio thar mawi tak mai, Scorpio N chu tlangzarh a ni ta a. He SUV mawi tak mai hian a chhuahna a la rei lo ang aiin book tu a hmu hnem a, mi nuai chuang zet an ni tawh a ni. Hetihlai hian Scorpio hlui chu a hmaa kan lo tarlan thin tawh angin a la chhuak zui zel dawn thung a, Scorpio Classic tih hming a pu ang a, a chhuak hlui nena khaikhinin danglamna hret hret a awm dawn a. Tunah hian dealership thenkhatah chuan hmuh tur a awm tan tawh a ni.
Mahindra hi Scorpio N an tlangzarhna la rei lo viau mahse Scorpio Classic hi tlangzarh turin an inpeih thawkhat tawh niin a lang a. Sawi tawh tunah hian dealer thenkhatah chuan an tithleng tan tawh a, heng dealer-a thleng tawhte hi a thlalak leh video te internet lamah a darh leh chuai chuai tawh a ni. Mahindra Scorpio Classic hi sawi tawh angin Scorpio tih hming puin Scorpio N nen a chhuak dun dawn a ni a, Scorpio chi hnih duhthlan tur tha tak tak a awm dawn ta a ni.
A hlui nena a danglamna
Mahindra Scorpio Classic hi a chhuak hlui Scorpio te nena khaikhinin a danglamna a tam lo viau a. A hma bawrah hian grille design thar a nei a, Mahindra SUV ho logo thar a nei bawk a ni. Hei bakah hian 17 inch alloy wheel thar a nei dawn a, he alloy wheel hian dual tone finish a nei dawn bawk a, hei hi a chhuak tawh thenkhata kan hmuh tawh ang a ni.
Scorpio Classic ro roah hian variant hrang hrang a awm leh dawn a. A man tlawm ber chu a hma ang bawkin a bumper bawr a dum a ni ang a, a wheel rim pawh thir hlang a ni leh dawn a ni.
A chhung
Scorpio Classic chhunga kan hmuh thar langsar deuh mai chu a, touchscreen infotainment system hlai tha tak a awm tur hi a ni a. Scorpio lo chhuak thin tawhah thung kha chuan touchscreen lian vak lo leh hmehna tur button hrang hrang a awm nual kha a ni a, tunah chuan a chhung landan pawh a mawi zual sawt dawn a, hmehna tur button hrang hrang tam lutuk pawh a rawn tlem tawh dawn a ni. HVAC controls chu a hmaa chhuak thin ang thoin a la awm ang a, a man tlawm berah erawh chuan infotainment system a awm dawn lo thung a ni.
Heng bakah hian a chhunga a centre console-ah hian dark-finish wooden inserts kan hmu ang a, hei mai bakah hian a dashboard-ah piano-black-finish inserts kan hmu bawk ang a, a chhung hi a ti lang changkangin a ti ‘class’ dawn hle a ni. Scorpio Classic manual gear lever knob pawh hi Mahindra model thar ho – XUV700, Scorpio N leh Thar-a kan hmuh ang a ni dawn a, hei pawh hian a chhung hi a chei dawn viau a ni. A steering wheel pawh a hmaa mi ang deuh chiah a ni dawn a, a danglamna awmchhun tur chu Mahindra SUV ho logo thar a chuang tawh thung dawn a ni.
Thildang
Suspension lamah hian a hmaa a neih thin ang chu Scorpio-ah hian ennawna a aia thaa duan a ni a. Hemi hmang hian a suspension avanga khalh nuam lo awm thei leh him lo awm thei chu a bo dawn niin tarlan a ni a, hei hi Scorpio hluia complain lut tam ber pawl a ni. Heng bakah hian a lirthei inghahna platform hi a hma aia tha lehzual tura khawih danglam a nih beisei a ni bawk a ni. A khawl hman tur chungchang hi sawilan a la ni chiah lo a, engpawhnise, reiloteah company lam atangin a khawl chungchang a ni emaw, thil dang hrim hrimah pawh thuthar a rawn awm thuai tawh hmel a, la nghah rih a ngai ang.
Mahindra Scorpio thar Scorpio N an tlangzarh tak hi tam tak chuan Scorpio chhuak hlui aiin a mawi an ti lo zawk a. A hlui ang design-a la lungawi zawk tlat an awm a. Heng mite tana Scorpio chhuak hlui ang chiah, tha lehzual tura khawih danglam leh thawm belh a lo chhuak tur hi thil lawmawm tak mai a ni a. Scorpio N mawi tak leh tha tak, 4 wheel drive system tha tak duthlan tur awm bawk baka a chhuak hlui, Scorpio Classic tih hming pua a lo chhuak leh tur hi thil lawmawm tak a ni a. Tun atanga reiloteah he SUV thar tha tak tur tho hi kan hmu thei turah beisei ila, SUV market lama Mahindra rawn puitu tha tak te pawh a ni dawn a ni.