Brazil-a court chuan nightclub pakhat kanga mi tam tak an thihna thlentua puh mipa pali, hun rei tak tang tura hremna pek tawh chu hnuk kirin a chhuah zalen.
Kum 2013-a an ram chhim lam, Santa Maria-a zan lama intihhlimna hmun, Kiss nightclub kangah hian mi 242 zet an thi a ni.
Club-ah hian band pakhatin mei an alh an ken chuan a chung (ceiling) man kaiin chhiatna lian tak a thleng ta a ni.
Kum 2021 khan band-a tel pahnih leh club neitu pahnihte chu tualthah leh tualthah tumnaah thiam loh chantirin hremna pek an ni.
An pali hian kum 18 atanga 22 chhung lung in tang tura hrem an ni.
Nilaini khan Rio Grande do Sul state-a judge pathum awmna court chuan ngaihtuah thain hremna lo pek tawh chu an chungthu rel danah dik lo a awm avangin a hnawl a ni.
Prosecutor-te chuan court thutlukna thar hi court sang zawngah ngaihtuah tha leh tura thlen ngei an tum tih an sawi nghal.
Court-in an hremna pek a hnuk kir sak avang hian mi pali hi an tanna atangin an chhuak zui a, pahnih phei hi chu Nilaini tlaiah an chhuak nghal niin news site G1 chuan a tar lang.
He kangmei chhuak hi Brazil ram chanchina a rapthlak ber a tling a, an ram pum a nghawng a. A hnuah hetiang hmuna kangmei laka himna dan hman mekte chu ennawn a nih phah bawk.
Chhuitute chuan dawhsana band-in mei an chhit chuan ceiling siam nana an hman insulation chu a man ta niin an sawi.
Thi tam zawk pawh hi kang hlum ni lovin insulation foam kangin boruak chhe tak a tihchhuah an hip luh vang a ni zawk bawk.
Chhiatna a thlen lai hian club thalai rual an inhnawh khawm a, a leng thei zat aia tam an ni a. Chhuahna pahnih chauh a awm bawk si avangin an talbuai ta a, mi 600 vel lai hliam tuar pawh an awm phah a ni.