Nilaini zanah Premier League club Brighton & Hove Albion chuan an full-back Marc Cucurella chu Chelsea hnena hralh turin inremna an nei niin thu thehdarh a ni a. Hei hi club lamin thu dik lo a nih thu sawiin inremna an la neih loh thu an sawi.
Spanish defender hi tunhnaiah chhuak tur anga sawi thawm a tam a. Manchester City chuan vawi hnih Brighton hi an dawr hnuah an umzui tawh lova. Chelsea rawn lang ve nghal zuiin Pound maktaduai 52.5 in inremna an nei niin sawi a ni.
Brighton chuan, “Chanchinbu hrang hrangah leh media hrang hrang kaltlangin inremna a awm niin thu a darh a, mahse Marc Cucurella hralh tur hian khawi club nen mah inremna a awm lo.” tiin an puang chiang.
Kum 24 mi hi tun nipuiah ngaihventu a ngah avangin chhuak tura ngaih erawh a la ni reng a. Man City leh Chelsea bakah a chawr chhuahna club Barcelona pawhin an duh.
Seagulls hian a manah Pound maktaduai 50 tal an beisei tlat avangin tun dinhmunah Chelsea chu lalut tura rinhlawh ber an ni mek a. Brighton in an beisei ang zat sum an pek theih bakah an centre-back Levi Colwill chu pek tel an phal.