Leicester City captain Kasper Schmeichel chuan kum 11 a lo khelh tawhna club chhuahsan in Ligue 1 club Nice a zawm.
Kum 35 mi goalkeeper hian Foxes tan vawi 479 a inkhel a, Leeds United atanga Leicester City a zawm hnuah an tan Premier League, FA Cup leh Community Shield te a chawi hman.
Schmeichel hi kum 2013-14 season a EFL Championship a champion team-ah a tel bawk.
French club hian tunhnaiah player langsar lakluh an neih pahnihna a ni a, Welsh midfielder Aaron Ramsey chu an lalut tawh.
Denmark tana vawi 84 khel tawh Schmeichel hi Leicester City in a chhuah an phalsak a. Club phalna nen Nice nen hian an indawr.
Leicester chairman Aiyawatt Srivaddhanaprabha, “Kasper hi kan hnena a cham chhung zawngin mawhphurhna la thin, hmahruaitu tha a ni a. Khelmual chhung leh pawnah hruaitu tha a ni.” tiin a fak.