China chuan US politician Nancy Pelosi-i’n a tlawh hnu lawkah Taiwan chhehvela sipai nunchan zirna lian ber a tan zui.
Hmanraw tak tak nena nunchan zir hi an ram sanaa Ningani chhun dar 12:00 (India-ah zing dar 9:30) khan tanin thliarkar atanga mel 12 leka hlaah pawh an nei.
Taiwan chuan China hian helaia status quo awm lai thlak danglam tuma a chetna niin a puh.
Tar lan tawh angin Pelosi-i hian reilo te Taiwan hi a tlawh a; mahse, sawi a hlawh hle a, China chuan an province chhunga an chhal thliarkar a tlawh hi an haw hle.
Sipai nunchan zir hi Beijing-in a chhan letna lian ber a ni a, thliarkar ram nena an insumdawn tawnna thenkhat a titawp rih bawk.
Nunchan zir hi khawvela tuikawng lun ber zinga mi huam chinah pawh an nei dawn a, silai tak tak pawh kah leh tihpuan a ni dawn tih Beijing chuan a sawi.
Taiwan chuan tuipui leh boruak chu kal theih lohva danchah rih mai a duh a, US pawhin nunchan zir chu inchhan letna tangkai lo leh thunun theih loh a nih theih thu a sawi.
Analyst Bonnie Lin chuan Taiwanese sipaiten an chhan let chuan thil duhawm lo a thleng thei niin a sawi.
“Entir nan China hian an thlawhna hi Taiwan chinah thlawhtir ta se, Taiwan-in lo hmuin vansangah intihpalh a awm thei a. Tuna kan hmuh mai bak hi boruak a siam thei,” a ti.
Taiwan hian China ram hnaih tak, Kinmen Islands vela Chinese indo thlawhna leh thil an kah chhuah thu an sawi.
Ministry eng emaw zat chu cyber-attack hmangin tun hnaiah beih an nih thu Taiwanese sorkar hian a sawi bawk.
Lawngte chu kawng dang zawh rih turin Taiwan hian a ti a, Japan leh Philippines dawrin thlawhna kal dan tur thlak dan a dap bawk.
Japan pawhin China sipaiten nunchan an zirna huam chin chu a ngaimawh a, exclusive economic zone (EEZ) an thleng chu tha a ti lo.
Hei hi chhangin Chinese sorkar thupuangtu, Hua Chunying chuan Beijing-in Japan EEZ tia an sawi fo chu a pawm ve lo tih a sawi.
Nilaini khan China chuan tuipui kama Zhejiang province-ah Taiwan inlak hran theih nana beitu pakhat chu an man a, ram himna tiderthawng nei niin an sawi tih tual chhung chanchinbute chuan an tar lang.