UFC in lightweight champion thar a nei a. Islam Makhachev chuan champion lai Charles Oliveira chu round hnihnaah ‘arm triangle choke’ hmangin a hneh a. 155 pound champion thar a ni.
Inrinni zana Abu Dhabi a UFC 280 main event-ah Makhachev hian a teammate leh tuna a coach-te zinga mi ni ta Khabib Nurmagomedov-a hnung a zui a. UFC lightweight kawnghren a hreng.
Makhachev hian a khingpui lakah hian chhuata inbeih a thiamna leh thahrui a ngahna a hmang thiam a. Champion lai Brazilian fighter hi ding chunga kut inthlak a rang tak, Jiu Jitsu a thiam avanga chhuata hlauhawm tak a ni bawk. Mahse Makhachev-a’n a chet hun tur tak a hria a, round hnih chhungin chiang takin tum hnih ‘counter punch’ hmangin a khingpui a hnek fuh a. Remchang a neih chu la in submission hmangin a chak phah.
“Hei hi ka coachAbdulmanap tan a ni. Kum tam tak kalta khan rim taka thawk a, champion ka nih tur thu hi min hrilh thin.” tiin Khabib-a pa Abdulmanap Nurmagomedov tan a hnehna a hlan.
UFC 284-ah featherweight champion ni lai Alex Volkanovski nen intum a duh thu a sawi a. Australian fighter pawh hian a chona pawmin nakkum February thla a an ram Perth a neih tura tinzawn ah ‘consensus No. 1 pound-for-pound champion’ nih an inchuh ngei dawn niin a lang.