Scottish football club Rangers chuan an manager Giovanni van Bronckhorst chu an club kum khat chauh a enkawl hnuah an ban.
Ibrox club hian Scottish Premiership-ah an hmelma Celtic chu point 9 in an pha lo mek a. Dutch coach Van Bronckhorst hian November 2021 khan club hi enkawl tanin Europa League final a hruai thlen bakah season liamta khan Scottish Cup a chawipui.
Tun season-ah Rangers an che fuh lem lova. UEFA Champions League chanchin a group stage a la che chhe ber an nih hnuah tualchhung league-ah an chesual leh thin a. Thla 12 hnuah club in an ban.
Rangers chairman Douglas Park chuan, “Tun thla 12 chhunga Gio thawhrimna leh inpeknaahte lawmthu kan sawi duh. Mahse tunhnaia result-te hi club leh Gio ngei pawhin a beisei ang a nih loh avangin vawiinah thutlukna siam harsa tak kan siam a ngai ta a ni.” tiin a sawi.
Rangers hian tun season-ah inelna hrang hrangah match 27 khelin vawi 9 an tlawm a, vawi 14 chak an nei. Nipui laia an player lak tharte beisei angin an khel lo thin bawk a. Defender John Souttar leh midfielder Tom Lawrence te hliamin a tihbuai bakah winger Rabbi Matondo leh left-back Ridvan Yilmaz te pawhin beisei an la pha lo.