Kum 40 dawn hnuah ‘Bondi Beast’ serial rapist hre chhuak

Mi a pawngsual tih hriat hmasak ber atanga kum 40 dawn a lian hnuah Australian police chuan Sydney khawpuia kum 30 chhung vel che tla thin serial rapist chu tunge a nih an hre chhuak ta.

Keith Simms-a hian kum 1985 leh 2001 inkar khan hmeichhia 31 zet a bitum a, an ina lutin emaw, khawlaia jogging an ti lai emaw a bei thin niin police chuan an sawi.

A tirah chuan detective-ten mi hrang hrang chetna nia ngaiin an chhui a; mahse, DNA technology hmanga endiknaah a vai hian February thlaa kum 66 mi nia thi tawh, Simms-a veka ni tih an hre thei ta a ni.

‘Bondi Beast’ leh ‘Tracksuit Rapist’ tia an sawi mai thin, Simms-a hian mi a pawngsual hmasak ber hi kum 1985 khan Clovelly daia tuipui kamah a ni a. A chet hnuhnung ber chu kum 2001 khan he mi bul lawk thlanmualah a ni.

A hun lai hian thil thlengte hi a hrana chhui zel a ni a; mahse, kum 2000 chho vel atang khan police hian inzawmna nei niin an hre tan.

Pawngsual tuar mi 12-te DNA endiknaah chuan a titu hi thuhmun tih hmuh chhuah a ni ta a, a dang 19-a mite pawh a titu an sawi a inang tlangpui bawk.

Hmeichhe pawngsualte hi kum 14 leh 55 inkar niin anmahni beitu an sawi chu a inang tlangpui hlawm.

Cm 160 atanga 180 inkar vela sang, vun hang lam, mitmu buang leh hnar per deuh niin an sawi vek.

A hmai a khuh a, khawlai len thawmhnaw – tracksuit, hoodie leh kekawrbul a ha niin an sawi hlawm a. Chemte nena a vau loh leh anmahni awih zawng tura awmin a thlem thin.

Kum 2019 khan chhuitute chuan DNA atangin mi rinhlelh an neih zat chu mi 324-ah an tihniam.

September khan Simms-a sample leh a tuartute atanga an lak chu a inmil chiah tih an hre thei ta a ni.

Tual chhung chanchinbute chuan Simms-a chhungte leh a thiante chuan chhungkaw pa, pu leh vantlang tana hnawksak lo tak a nih thu an sawi tih an tar lang.

A chhungte hnena hrilhtu detective-te pawhin a chhungte hian mak an lo tiin hetiang ti tura an ngaih loh thu an sawi.

“A nupui kan hmu a, mak a ti tak zet,” tiin Detective Sergeant Shelley Johns chuan The Daily Telegraph a hrilh.

“Hetiang thil ti tur chi niin an hre lo,” a ti.

Chhuitute hian pawngsual tuarte hnenah hian a titu an hriat tawh thu pawh an hrilh tawh hlawm a; mahse, amah ber a thih tawh avangin dan anga hma lak zui theih a ni lo tih an sawi.

Leave a Reply

Your email address will not be published. Required fields are marked *

error: Content is protected !!