Aizawl : Serchhip Bawrhsap Nazuk Kumar leh C Lalhminghlua, President, MJA Serchhip District hoin nimin khan Serchhip DIET chuan lehkhabu chhiar ni ‘Reading Day’ an hmang.
DIET Serchhip Campus tuala hun hman hi Lalrammawia, Principal, DIET, Serchhip-in a kaihruai a. Serchhip Bawrhsap Nazuk Kumar chuan thu sawiin, a bikin zirlaite tan lehkhabu chhiar tam chu an zirlaiah nasa taka a puih dawn thu leh lehkhabu chhiar tam tam chuan ziak mite pawh nasa taka a puih thin thute, lehkhabu hrang hranga thupui hrang hrang ngaihnawm tak takte chuan an zirnaah leh nitin nunah a tha zawnga thui tak hna a thawh theih avangin nitin lehkhabu phek khat chhiar a bul tan thar leh theuh turin a chah.
Khualzahawm C Lalhminghlua,President, MJA Serchhip District pawhin thu sawiin, tun lai khawvelah lehkhabu aia phone hmang nasa zawk mi tam takin an chhiat phah thin tih a sawi a. Tun ang laiah naupang tan huai viau emaw, hun hman nawm viau tum emaw, a pawimawh ber lo a, lehkha chhiar a, lehkha zir tam a pawimawh zawk tih a sawi.
‘Lehkhabu Chhiar Ni’ hun buatsaihah hian zirlaite puitu lehkhabu tha tak tak bakah, thawnthu bu ngaihnawm tak tak chhawpchhuah niin, he hunah hian Serchhip DIET zirlaite leh thawktute bakah Govt Serchhip Chandmary Middle & Primary School zirlai naupangte leh zirtirtute, Serchhip-a thuthar lakhawmhtute an tel a. Lehkhabu chhawpchhuah te hi an chhiar an ni.