Season liamta khan an tluan tling lova, Manchester City el turin an famkim tawk lo. Tun tumah erawh champion lai hi an khing tak tak thei tawh dawn tih Arsenal in an lantir a, Community Shield-ah penalty shootout a hnehna changin season thar bul an tan.
English football season khuhhawnna inkhelah hian Gunners hi chiang takin kheltha zawk an ni a, mahse goal an chhuah hmasak avangin tlawm thei dinhmunah an ding.
Wembley Stadium-ah a tir minute 70 chhung goal hlauhawm a tam lo, hlauhawm siam tum ve ve mahse an tluan tling thin lo.
Minute 77-naah City substitute Cole Palmer chuan danglamna a siam a, ding lam sir atang muallai ‘half space’ ah lutin a ke veilamin a pet lut mawi.
Huntawp dawn hun pekbelh minute 8 niin Kyle Walker leh Thomas Partey te insu buaipui an ngaih avangin pawhsei a ni a, minute 101-naah Leandro Trossard chuan an si phurh a sut a, hun tawp nghal in penalty an pet.
Penalty shootout-ah Manchester City tan Kevin de Bruyne chuan crossbar pet perin Rodri pet chu Aaron Ramsdale-a’n a save bawk a. Fabio Vieira in chakna penalty a khung.
Rilru indona
Arsenal in ni 248 chhung hma an hruai hnuah an champion zo lo. A hun taka vung taka kal City lakah an dingchang thei lo. Gunners hian nikumah nasa takin hma sawn mahse title chuh tura beisei an ni lo.
Tun tumah erawh City elpui tur nih an tum a, champion an tum a, hemi kawnga ke pen pawimawh tak ni turin Manchester City an hneh thei a ni tih an lantir a, hei hian inrintawkna lian leh zual a pe dawn.
Gunners in nipui a player an lakluh manto pathum an chhawr nghal vel a, Kai Havertz-a’n chance tha lutuk a neih chu tum hnih a khung lo.
Arteta thluak fing in awmzia a nei a, substitute Trossard a dah lut chuan danglamna a siam a. A tawp thlenga an ‘fight’ theihna hi season tluanin a pawimawh dawn.
Arsenal manager Mikel Arteta chuan, “Wembley Stadium a khawvela team tha ber hneh chunga champion tluka nuam hi a awm tam lo. Kan chak dan khan a ti ropui leh zual.”
“Player te hian tupawh kan hneh thei tih rilru an put tlat chuan thil tha a ni. Champion tum kan ni a, hlawhtlin ngei kan duh.” tiin a sawi.
Inkhela sawi hlawh chu tun season a hman tur dan thar a ni a. Hun khawhral a tlem nen stoppage time-ah inkhelh laia hun khawhral zawng zawng chu kal tir a ni vek tawh dawn. Hei bakah hian coach-ten match official te awmna an va pan thiang tawh lova, yellow card pek zel ni tawhin Arteta pawh pek a ni nghal.
Hei bakah hian Thomas Partey leh Julian Alvarez pawh freekick ham a nih hnua ball an pet sawn avangin yellow card pek nghal ve ve an ni.