World champion Argentina in kum 2026 FIFA World Cup qualifying-ah hnehna changin bul an tan a, Ecuador lakah 1-0 a chakin an chakna goal khungtu hi tudang ni lovin Lionel Messi a ni.
Zirtawpni zinga Monumental Stadium-ah Argentina in point thum hmu in CONMEBOL qualifying-ah hian bul an tan a, Buenos Aires a mipui 83,000 hmaah Messi-a freekick mawi hmangin an chak.
Argentina hi an mualah an chungnung zawk a, ball chang hnemin Ecuador goal bawh nat tum mahse an khingpuite tlarhnung a nghet. La Albiceleste hian goal hlauhawm insiam an harsat fo.
Nimahsela second half-ah captain Messi a inlar a, club lamah Inter Miami tana a chetthat chu ram tan chhunzawmin minute 77-naah freekick atangin goal a khung a. Football a khelh chhunga a freekick goal 65-na niin David Beckham a tluk chiah a ni.
Messi hian Argentina tana a khelh hnuhnung match 8-ah goal a khung vek a, Luis Suarez tluk chiahin CONMEBOL World Cup qualifying-ah goal 29 a khung tawh bawk.
Lionel Scaloni pawlte hian World Cup qualifying-ah match 22 tlawm lova kal tawhin kum 2017 a Bolivia laka an tlawm hnuah qualifier bikah tlawm an la nei leh lo.
Inkhel dangah Colombia in 1-0 in an mualah Venezuela an hneh a. Metropolitano Roberto Meléndez a inkhelah hian Rafael Borrre chuan goal a khung.