Nimin khan hmun hrang hrangah National Voluntary Blood Donation Day hman a ni a. National Voluntary Blood Donation Day hi October ni 1 ni mahse, he ni hi Pathianni a nih avangin Mizoram hmun hrang hrangah chuan nimin khan hman a ni. Lungleiah chuan Govt. Higher Secondary Sch- ool, Lungleiah chawhnu dar 2 ah Lunglei Bawrhsap Ramdinliani hovin hun an hmang.
Lunglei Bawrhsap chuan HIV darh zel tur ven nan thalai te pawimawh zia te, midang te tana thisen pek aia thil tha tih a awm tam loh thu te a sawi a. Thisen hlutna leh khawvel pumpui huapa Mizoram tluka thisen inpek leh dawn awlsamna a tam loh thu te sawiin, mahni rilru leh taksa hriselnan te, thisen pek hmaa screening neih chu mahni dinhmun hriatna remchang a nih thu te a sawi a, Zirlaite chu thisen pek uar sauh sauh turin a fuih.
Lungleia National Voluntary Blood Donation Day puala hun hmannaah hian zirlaite hnenah thupui pathum – ‘Thisen pek thatna leh thisen pe tura nunphung hrisel’ leh ‘HIV chung- chang inzirtirna’ leh ‘Voluntary Blood Donation pawimawhna’ tih te hma- ngin awareness pek a ni.
Awareness atan hian resource person – Dr. Vanlallawma Khiangte, Blood Bank Officer, Civil Hospital Lunglei, Lalnunzami Chawngthu, Project Manager, Grace Society Lunglei leh R. Lalrochama, Associate Professor, Govt. College Lunglei te hman an ni.
Champhai-ah pawh he ni hi Champhai South Higher secondary scho- ol-ah Champhai Bawrh- sap James Lalrinchhana, hovin an hmang a. Baw- rhsap chuan zirlai kal- khawm te chu he hun hi midangte tana malsaw- mna an nih theihna atana pawimawh tak a nih thu hrilhin, midang nun chh- an nana thisen pe tawh zawng zawngte fakawm a tih thu a sawi a. “Thi- sen pe theitua kan awm a nih chuan thisen pek uar sauh sauh ang u” a ti.
Champhai Bawrhsap chuan “Thisen kan pek hian a dawngtu chauh ni lo, a petu ten kan hlawkpui a ni” a ti a. “Thisen pe thei turin kan nun kan uluk a, ruihhlo laka kan fihlim a, kan taksa tana thalo lakah kan inthiarfihlim a ngai” tiin, “kan nun kan uluka kan hriselna kan vawnthat chuan midangte tan malsawmna kan nithei a ni tih hre reng ang u” a ti bawk a ni.