Venhim hna thawktuten India-in a awp chin Kashmir-ah hel pawla tel nia hriat mi pahnih leh an thawhpui mi dang pahnih an thah thu an puan tuk lawkah, an zinga pathum chhungte chuan ‘pawisawi lo civil mi thahna’ tia sawiin an ruang hmuh ngei an phut.
Police chuan Srinagar, Hyderpora venga shopping centre-ah hel an awm tih thu an dawn bawhzuia Thawhtanni tlaia an chet chhuahnaah heng mite hi an that tih an sawi.
Darkar khat chuang inkahnaah hian police chuan hel pawla tel nia hriat mi pahnih leh mi dang pahnih, shopping centre neitu kum 48 mi, sumdawng, Altaf Ahmad Bhat leh kum 40 mi, dental surgeon Mudasir Gul an thih thu an puang.
Vijay Kumar, inspector general of police chuan Thawhlehnia thuthar lakhawmtute a kawmnaah an pahnih hian helho tawmna pindan kawhhmuh tura an tiha a kawngka an kik chuan an chhang duh lo niin a sawi.
“An kik nawn lehah helho hian kawngka hawngin pistol-in an kap zui a, kan mite pawhin invenna silai an hmet puak,” a ti.