Khawvela saptawng dictionary hriat hlawh ber zinga mi, Oxford Dictionary chuan kum tina an tih thin dan angin kumin chhunga thumal (word) lar ber (?) an thlang chhuak leh ta a, an thlan chhuah erawh chuan mi nuih a tiza angreng hle a; mahse, an thlan chhan an tar lan nen erawh a inhmeh fu tho mai.
Oxford Dictionary-in Word of the Year 2018 atana an thlan hi ‘toxic’ tih a ni daih a, a awmzia chu ‘tûr pawlh’ tihna a ni deuh ber mai a. An thumal thlante hi kum khat chhunga hman rim, mi awm dan (mood) thlenga khawih thei thil lam deuh a ni thin a; mahse, kumin chu chutiang lam lo daih a ni ta a ni.
An sawi dan chuan he thumal hi thlan âwm tak a ni a, “He thumal hi ‘toxic air’ atanga ‘toxic politics’ thlengin kan hmang a, kumin hi tûr hmanga pawlh thil hrang hrang thlen kum a ni a, chu chu kan thlan chhan a ni,” an ti ve thung a. Khawvel thil thleng thlir chuan a âwm viau tho a ni.
Chutih rual chuan ‘toxic’ tih thumal hi khawvel huapa zaithiam hriat hlawh, Britney Spears chuan a hla pakhat hmingah hmangin a lo hlawhtlinpui hle tawh a, chu chu kum 2003 daih tawh kha a ni nghe nghe a. Tuna lar thar leh anga a lang ta hi mi nuih tizatu a ni.
Thumal hman rim leh lar bera an thlan rual chiahin Spears-i chu mi thinlungah a lo lang nghal a, fiamthu thawh nan pawh an hmang zui nasa hle a. Social media hrang hrangah an tar lang a, “He thumal hi 2018 word of the year a ni a, Britney Spears-in kum 2003-ah a lo thehlar daih tawh!” tih te; “Oxford-in ‘toxic’ tih hi word of the year-ah an thlang a, Britney Spears hi kan hunah a lo let leh dawn ta em ni?” tih te; “Britney Spears-i ‘Toxic’ kha kum 2003-a chhuak a ni a, engvangin nge tunah word of the year a nih theih?” tih te leh fiamthu nana hmanga thu hrang hrang ziak an tam hle a ni.
Oxford Dictionary erawh chuan a thlang fel tawh tho tho va, “Adjective a ni a, ‘poisonous’ tia hrilhfiah theih a ni a. Saptawngah hian kum zabi 17-na laihawl vel atangin a tel tan a, Latin hun laihawla ‘toxicus’ an tih, ‘poisoned’ emaw, ‘imbued with poison’ emaw tihna a ni,” tiin a awmzia leh a lo chhuah dan an sawi.
“Kum 2023 hi thil hrang hrangin a pawlh a, tûr hlauhawm tak tak hi thupui (topic) lian tak takah hian a inzep nasa em em a ni,” an ti bawk.
Kumina word of the year thlanaah hian ‘toxic’ tih thumal bakah hian gaslighting, incel, cakeism leh orbiting tihte pawh thlan chhuah tura chhawp chhuah zingah a tel a ni.