Kar kalta mai khan Shillong khawpuiah cherry blossom festival an hmang a. He festival hi an hlawhtling hle. Khawvel huapa milar Irish zaithiam Ronan keating, American Ne Yo, etc an chahchhuak a. Shillong khawpui hian he festival hi sum leh pai, tourism lama hmingthanna, anmahni hnam thil phochhuahna remchang leh kawng hrang hrangah an hlawhtlinpui takzet dawn ani tih national news ah te hmuh tur a tam hle. Cherry blossom festival hi kum 3 an hmanna chauh a la ni a. Hetianga an hlawhtling thei hi a ropui takzet mai.
Engtiangin nge an buaipui le. An tourism department chu a thlauk bur berah tangin an festival hi hetiang lam organise thang pawn lam mi chi hrang hrang an ruai a. An state sawrkarin thu ber nih an tum lova. Company te kutah an dah fai deuh vek ani zawk mah a. Company lam chuan thil a hlawhtlin dan tur leh hmun danga an lo tih thin angin an ruahman a. Khawvelina an duhzawng an hria ani ber.
Keini ve hi le. Kum 40 chuang chapchar kut chu kumtin kan hmang tawh a. Kan statesawrkarin a sponsored a. Sum leh pai tam tak sengin mahni tawkah kan hlimpui ve viau thin. Chapchar kut hi kan hnam thil a ni a, engpawh nise hnam zia chawilen nan kan hmang a, a tha e. Amaherawhchu chapchar kut nilo, khualzinte hip tumna lam leh hlawk nana hman tura kan ruahman heng Anthurium festival, winter festival kan hman ve thinte erawhin kan thenawmte festival chu a la thlau takzet a. Mi chuan pawnlam mi hip thei ang ber turin ngaihtuahna an seng a. Anmahni kut veka thil dah lovin mithiam an hmang tangkai a. An hlawhtling ni berin a lang. Keini ve hian tinge mi state tih ang kan tih ve theih loh le. Engvang hian nge mi hip khawm kan ngaihtuah ve phak lo a ang khawp mai. Kan sawrkar department te an thu hle a. Tourism hotute leh minister te duh danin kan hmang thin ani ber a. Kan sawrkarin sum a tum a, mahse kan beisei ang chuan engmah vak chu kan thleng ngai lem lova. Mahniin kan hlimpui viau bak han sawi chhunzawm em em tur kan hre lova. Sumdawnna lamah kan thlen san pui hran lova. Tourist an lo tam phah lova. Sum tam tak kan thehthang a. Kan hmang zo ve ani tawp mai.
December thla hian winter festival kan hmang ve leh dawn a. Assam rifles lammual kan han tin leh tawp phawt a. Department hrang hrang aiawhte chu a committee member ah an han awm leh phawt a. Thil thar kan hmu dawn em lo thlir ila. Engatinge miin an hlawhtlin pui chu engmah loa kan chhuah bik zel ang le. Kan ngaihtuahna hi hawi zau se. Tourist hip khawm tur hian pawn lam mithiamte pawh kan chah lutin hma a lak ho theih lo’m ni? Kan state chhunga hetiang lama lo hawiharh deuh thin mimalte pawh kokhawm ila. A rorelna hi i ti zau deuh ang u. Thuneihna phalrai deuh a, ngaihtuahna seng zau zawnga kan chet a va hun em. Chu chuan kan ram tan hlawkna a thlen chauh ang. Tuna china kan kalphung tawh thin hi chuan engmah min thlen lo chu ania. I lo thlir leh phawt mai ang.