Nottingham Forest boss Steve Cooper chuan an striker Taiwo Awoniyi chu inhliam avangin thla engemaw zat a chawlh a ngai dawn tih a sawi.
Kum 26 mi hi international break chhung khan Nigeria tana a inkhelh tumin a inti na a. A hliam hi zai a ni tawh.
Awoniyi hian tun season-ah Forest tan Premier League match 10 khel tawhin goal li a khung tawh a. A hliam hi hun engemaw chen atanga a neih tawh a ni a, tunhnaiah a tihnat belh hnuah zai a ni ta zawk.
Cooper chuan, “Tun season-ah kan chhawr leh thei ngei dawn, mahse zai ngai a ni a, chuvangin a chawlh deuh rih a ngai ang.”
“Taiwo tan hian thil duhawm lo tak a ni a, mahse thla engemaw zah chawlh hnuah a lo kir leh thei ang. Keini lamin tha taka a lo kir leh theih nan theihtawp kan chhuah dawn.”
“Inhliam hi a tan a pawi a, keini pawhin kan tuar hle dawn. A goal khungte kan tan a pawimawh hle.” a ti.
Liverpool a khel thin Awoniyi hian season liamta khan league goal 10 khungin Forest in Premier League a inhamtan an tumna kawnga tha thawhhlawk tak a ni.