Bayern Munich striker Harry Kane-a’n inkhel a goal awmchhun khungin FC Cologne lakah 1-0 in an chak a, Bundesliga table chungah zan khat chhung an chho.
Zirtawpni zana RheinEnergieStadion a inkhelah hian England captain in minute 20-naah goal a khung a. Bundesliga record thar ni turin season thara league inkhel hmasa 12 atang goal 18 a khung tawh.
Tun nipui a Bayern Munich in Euro maktaduai 100 a an lakluh Kane hi Bundesliga season khat a English player goal 18 khung tling thei hmasa ber a ni bawk a. Kevin Keegan leh Jadon Sancho ten goal 17 an khung chu a khum a ni.
Bayern hi tun season league lamah an la tlawm lova, Bayer Leverkusen nen an inum ngawrh hle.
“Result kha a pawimawh ber a, second half-ah ball kang in an khel nasa a. Mahse kan fimkhur avangin an hlauhawm phah lutuk lo.” tiin an chak hnuah Kane chuan a sawi.
Inrinni zanah season bul tan tha tak Bayer Leverkusen in league table chung ber a kir leh turin Werder Bremen 3-0 in an hneh.
Weserstadion-ah Xabi Alonso pawlte hian Jonas Hofmann cross atanga Olivier Deman in an lama a tih luh bakah Jeremie Frimpong leh tunlaia Europe a left-wing back che tha ber pawl Alejandro Grimaldo te goal khung hmangin hnehna an chang.
Bayer Leverkusen hian an club chanchin a record awmlai tluk turin Bundesliga inkhelah a zawnin vawi 8 an chak tawh.