Aizawl: Dawrpui South Welfare chuan nimin khan Bazar Bungkawn atanga Zodin inkarah kawngkam hnatlangin an thian fai.
Hnatlanga mi 60 chuang thawk chhuakte hian kawngkama thil eina kawr, meizial bung leh kuhva chinai tahna leh bawlhhlawh dang te chhar faiin, kopanga hnim to te pawtin an veng thenawm Tuikual nena an inpawhna kailawn, ruihhlo hmansualna remchang taka hman thin leh tawp tak chu an thian fai a, an area chhunga tui luankawr an hiatfai bawk.
Dawrpui South Welfare hi February 2, 2017 khan din a ni a, an din atangin khawtlang faina kawngah nasa takin tan an la a, kum tin hnatlang an koh thin bakah an huamchhunga in leh dawrkai te hnenah faina lehkha an sem thin a, faina kawngah Welfare hian tan a la nasa hle a ni.
Dawrpui South Welfare hruaitute chuan Dawrpui chu Aizawl veng lunlai, khualzin leh tualchhung mi zawng zawng ten an tlawhpawhna veng anih avangin faina uar taka an kalpui chu zawmsak se an duh thu leh Zodin leh a chhehvel chu ruihhlo tihbuangbar nana hmang lo turin mipuite an ngen.